શ છ ગવ સવલ કડ? UCC વશ કમ થઇ રહ છ ચરચ આઝદ પહલ જ લગ હત અહકયદ

વડાપ્રધાન નરેન્દ્ર મોદીએ 27 જૂને ભોપાલમાં એક રેલીમાં કહ્યું હતું કે એક ઘરમાં બે કાયદાથી દેશ નહીં ચાલે. ભારતનું બંધારણ પણ નાગરિકોના સમાન અધિકારોની વાત કરે છે. ત્યારથી સમગ્ર દેશમાં યુનિફોર્મ સિવિલ કોડને લઈને ચર્ચા શરૂ થઈ ગઈ છે. કાયદા પંચે યુનિફોર્મ સિવિલ કોડ અંગે સૂચનો માંગ્યા છે. કાયદા પંચે ધાર્મિક સંસ્થાઓના વડાઓ અને સામાન્ય નાગરિકોને સૂચનો મોકલવા વિનંતી કરી છે. આ દરમિયાન ગોવા સિવિલ કોડને લઈને પણ ચર્ચા શરૂ થઈ ગઈ છે. આઝાદી પહેલા લાગુ થયેલા આ કાયદાને લઈને RSSનું નિવેદન પણ સામે આવ્યું છે. આરએસએસના રાષ્ટ્રીય કાર્યકારિણીના સભ્ય ઈન્દ્રેશ કુમારે કહ્યું કે ગોવામાં આટલા વર્ષોથી કોઈ સમસ્યા નથી, તેથી જો સમગ્ર દેશમાં UCC લાગુ કરવામાં આવે તો પણ લોકોને કોઈ સમસ્યાનો સામનો કરવો નહીં પડે. છેવટે, ગોવા સિવિલ કોડ શું છે, ચાલો તેને વિગતવાર સમજીએ.

સમાન નાગરિક ધારો શું છે ?

એક દેશ એક કાયદાના વિચાર પર આધારિત છે સમાન નાગરિક સંહિતા.યુનિફોર્મ સિવિલ કોડ લાગુ થયા બાદ દેશના તમામ ધાર્મિક સમુદાયના લોકો માટે એક જ કાયદો રહેશે. યુનિફોર્મ સિવિલ કોડમાં તમામ ધર્મો અને સમુદાયો માટે મિલકત, લગ્ન, છૂટાછેડા અને બાળક દત્તક લેવા વગેરે અંગે એક સમાન કાયદો બનાવવાનો છે. ભારતીય બંધારણની કલમ-44 હેઠળ સરકાર યુનિફોર્મ સિવિલ કોડ પર કાયદો બનાવી શકે છે.

ગોવ સિવિલ કોડ શું છે ?

ગોવા એકમાત્ર એવું રાજ્ય છે જ્યાં યુનિફોર્મ સિવિલ કોડ લાગુ છે.ગોવા સિવિલ કોડને સમજવા માટે ઇતિહાસના પાના ફેરવવા પડશે. વાસ્તવમાં, 1867માં જ્યારે ગોવા પોર્ટુગલના કબજા હેઠળ હતું, ત્યારે ગોવામાં સમાન નાગરિક સંહિતા કાયદો લાવવામાં આવ્યો હતો. તે 1869માં અમલમાં આવ્યો હતો. તે પોર્ટુગીઝ સિવિલ કોડ તરીકે ઓળખાતો હતો. 1961 માં જ્યારે ગોવા પોર્ટુગલથી સ્વતંત્ર થયા પછી ભારતનો એક ભાગ બન્યું  ત્યારે પોર્ટુગલ દ્વારા ગોવામાં લાદવામાં આવેલ પોર્ટુગીઝ સિવિલ કોડને ગોવા, દમણ અને દીવ એડમિનિસ્ટ્રેશન એક્ટ, 1962ની કલમ 5(1) માં ભારત સરકાર દ્વારા બદલવામાં આવ્યો. એટલે કે સ્વતંત્ર ભારત મુજબ, ભારત સરકારની સંમતિથી 1962માં ગોવામાં યુનિફોર્મ સિવિલ કોડ લાગુ કરવામાં આવ્યો હતો.

ગોવા સિવિલ કોડ કાયદો તમામ ધર્મોને સમાન રીતે લાગુ પડે છે. જેમાં પતિની મિલકતમાં પત્નીને સમાન અધિકાર આપવામાં આવ્યો છે. જેમાં માતા-પિતાએ તેમની મિલકત બાળકોમાં સમાનરૂપે વહેંચવી પડશે. એટલે કે મિલકતમાં પુત્રને જેટલો અધિકાર મળશે તેટલો જ અધિકાર પુત્રીને પણ મળશે. બીજી તરફ, જ્યારે લગ્નની વાત આવે છે, ત્યારે પરિણીત વ્યક્તિ કાયદેસર છૂટાછેડા લીધા વિના બીજી વ્યક્તિ સાથે લગ્ન કરી શકતી નથી. ગોવામાં પતિ-પત્ની બંનેની આવક પર ટેક્સ લાગે છે.

યુનિફોર્મ સિવિલ કોડ પર સુપ્રીમનું શું વલણ છે ?

સુપ્રીમ કોર્ટે 1985માં શાહ બાનો કેસમાં કહ્યું હતું કે આ ખૂબ જ દુઃખદ છે કે કલમ-44 મૃત પ્રાય  બની ગઈ છે. કોર્ટે કહ્યું કે બંધારણમાં એવી જોગવાઈ છે કે નાગરિકો માટે સમાન નાગરિક સંહિતા બનાવવી જોઈએ, પરંતુ સરકારી સ્તરે તેના કોઈ પુરાવા નથી. ત્યારબાદ વર્ષ 1995 માં સરલા મુદગલ કેસમાં સુપ્રીમ કોર્ટે સવાલ પૂછ્યો હતો કે આખરે સરકાર બંધારણના ઘડવૈયાઓની ઈચ્છાઓ ક્યારે પૂરી કરશે, તેમની ઈચ્છાઓ પૂરી કરવામાં કેટલો સમય લાગશે. વર્ષ 2003માં જ્હોન બાલાવટ્ટમ કેસમાં કોર્ટે કહ્યું હતું કે તે દુઃખની વાત છે કે આજ સુધી કલમ 44 લાગુ કરવામાં આવી નથી. સંસદે હજુ પણ આ દિશામાં પગલાં ભરવા જોઈએ. આ પછી 2017 માં પણ સુપ્રીમ કોર્ટે કહ્યું હતું કે અમે ભારત સરકારને યોગ્ય કાયદો બનાવવા પર વિચાર કરવાનો નિર્દેશ કરીએ છીએ. 2019ના જોસ પાઉલો કેસમાં પણ સુપ્રીમ કોર્ટે કહ્યું હતું કે દેશમાં સમાન નાગરિક સંહિતા લાગુ કરવા માટે હજુ સુધી અસરકારક પ્રયાસો કરવામાં આવ્યા નથી.

from Top Stories News - Gujarat Samachar : World's Leading Gujarati Newspaper https://ift.tt/lnZz5AJ
via IFTTT