2000ની 93% નોટ બેંકમાં પરત જમા થઈ... RBIએ કહ્યું, હવે ચલણમાં માત્ર રૂ.24 લાખની નોટ

નવી દિલ્હી, તા.01 સપ્ટેમ્બર-2023, શુક્રવાર

દેશમાં 19 મે-2023ના રોજ રૂપિયા 2000ની નોટો ચલણમાંથી બંધ કરી દેવામાં આવી હતી, ત્યારે આજે દેશની મોટી બેંક રિઝર્વ બેંક ઓફ ઈન્ડિયા (RBI)એ 2000ની નોટો અંગો મોટું નિવેદન આપ્યું છે. RBIએ જણાવ્યું કે, રૂપિયા 2000ની 93 ટકા નોટો દેશની બેંકોમાં જમા થઈ ગઈ છે. બેંકે જણાવ્યું કે, 31 ઓગસ્ટ-2023 સુધીમાં 3.32 લાખ કરોડના મૂલ્યની 2000 રૂપિયાની નોટો બેંકોમાં પાછી આવી ગઈ છે. હવે બજારમાં માત્ર 24 લાખ રૂપિયાની નોટો જ ચલણમાં છે.

જુલાઈમાં 3.14 લાખ કરોડની 2000ની નોટો બેંકમાં પરત આવી હતી

આ અગાઉ જુલાઈમાં 2000ની 88 ટકા નોટો દેશની બેંકોમાં જમા થઈ હોવાનું આરબીઆઈએ જણાવ્યું હતું. 31 જુલાઈ-2023 સુધીમાં માર્કેટમાં રૂ.42,000 કરોડની નોટો ફરી રહી હતી. 31 જુલાઈ-2023 સુધીમાં 3.14 લાખ કરોડ રૂપિયાના મૂલ્યની 2000 રૂપિયાની નોટો બેંકોમાં પાછી આવી ગઈ હતી.

2000ની નોટો જમા કરાવવા માટેની ડેડલાઈન 30 સપ્ટેમ્બર-2023

ભારતીય રિઝર્વ બેન્કે 2000 રૂપિયાની નોટને જમા કરાવવા માટે 30 સપ્ટેમ્બર 2023ની ડેડલાઈન નક્કી કરી છે. જો તમારી પાસે હજુ પણ 2000 રૂપિયાની નોટ હોય તો આને ડેડલાઈન પહેલા બેન્કોમાં જમા કરાવી દેજો. કેમ કે 2000 રૂપિયાની નોટને જમા કરાવવાની ડેડલાઈન સરકાર લંબાવાની નથી.

મે મહિનામાં સરકારે નિર્ણય લીધો હતો

ભારતીય રિઝર્વ બેન્કે મે મહિનામાં સૌથી મોટી કરન્સી 2000 રૂપિયાની નોટ પર નિર્ણય લીધો હતો, જોકે રિઝર્વ બેન્કે કહ્યુ હતુ કે 2000 રૂપિયાની નોટ 30 સપ્ટેમ્બર સુધી માન્ય રહેશે. રિઝર્વ બેન્ક ઓફ ઈન્ડિયાએ 2000 રૂપિયાના નોટને ક્લીન નોટ પોલિસી હેઠળ બંધ કરવાનો નિર્ણય કર્યો હતો. આ પોલિસી હેઠળ આરબીઆઈ ધીમે-ધીમે 2000ની નોટ બજારમાંથી પાછી મંગાવી રહ્યા છે. 

2016માં રિઝર્વ બેન્કે આ નોટ બહાર પાડી હતી

વડાપ્રધાન નરેન્દ્ર મોદીએ 8 નવેમ્બર 2016એ દેશમાં નોટબંધીનું એલાન કર્યુ હતુ ત્યારે 500 અને 1000 ની નોટ ચલણમાં રદ કરી દેવાઈ હતી. સરકારના આ નિર્ણયથી દેશમાં ખૂબ હાહાકાર મચી ગયો હતો, પરંતુ બાદમાં નવી નોટ કરન્સી માર્કેટનો ભાગ બની. સરકારે 200, 500 અને 2000ની નોટ લોન્ચ કરી હતી પરંતુ હવે આમાંથી 2 હજારની નોટ પાછી મંગાવવામાં આવી છે, નવેમ્બર 2016માં નોટબંધી બાદ આગામી અમુક મહિનાઓ સુધી દેશમાં ખૂબ અફરાતફરીનો માહોલ બની રહ્યો હતો. લોકોને જૂની નોટ જમા કરાવવા અને નવી નોટ મેળવવા માટે બેન્કોમાં લાંબી લાઈનોમાં ઊભુ રહેવુ પડ્યુ હતુ. 

from Top Stories News - Gujarat Samachar : World's Leading Gujarati Newspaper https://ift.tt/yolY2zB
via IFTTT