યોગીના મંત્રીએ શિવલિંગ પાસે હાથ ધોયા, કોંગ્રેસે સનાતન ધર્મનું અપમાન ગણાવ્યું

- હાથ ધોતો વીડિયો વાયરલ, વિપક્ષે રાજીનામુ માગ્યું

- જો કોઇ અન્ય જાતિના મંત્રીએ આવુ કૃત્ય કર્યું હોત તો યોગીએ ક્યારના કાઢી મુક્યા હોત : સપાનો પણ ટોણો

લખનઉ : ભાજપ તામિલનાડુના મુખ્યમંત્રી એમ. કે. સ્ટાલિનના પુત્રના સનાતન ધર્મ અંગેના નિવેદનને લઇને વિપક્ષને ઘેરી રહી છે. એવામાં હવે વિપક્ષ કોંગ્રેસ, સપા સહિતનાએ ભાજપને ઉત્તર પ્રદેશના મંત્રી સતીષ શર્માને લઇને ઘર્યા છે. એક વીડિયો સોશિયલ મીડિયા પર વાયરલ થયો છે. જેમાં ઉત્તર પ્રદેશ સરકારના મંત્રી સતીષ શર્મા શિવલિંગ પાસે હાથ ધોતા જોવા મળ્યા હતા.

ઉત્તર પ્રદેશના બારાબાંકીમાં લોધેશ્વર મહાદેવ મંદિરની મુલાકાતે યોગી સરકારના મંત્રી સતીષ શર્મા પહોંચ્યા હતા. સતીષ શર્માએ ધાર્મિક વીધી કર્યા બાદ શિવલિંગના એકદમ નજીકમાં જ પોતાના હાથ ધોયા હતા, મંત્રી હાથ ધોઇ રહ્યા છે તેવો વીડિયો સોશિયલ મીડિયા પર વાયરલ થયો હતો. આ સમગ્ર મામલે બાદમાં કોંગ્રેસ અને સમાજવાદી પાર્ટીએ મંત્રી અને ભાજપને ઘેર્યા હતા. કોંગ્રેસે માગણી કરી હતી કે યોગી સરકારના મંત્રીએ સનાતન ધર્મનું અપમાન કર્યું છે, માટે તેઓએ મંત્રી પદેથી રાજીનામુ આપી દેવું જોઇએ.  ઉત્તર પ્રદેશના કોંગ્રેસ પ્રમુખ અજય રાયે કહ્યું હતું કે મંત્રીને એ ખ્યાલ હોવો જોઇએ કે તેઓ શું કરી રહ્યા છે. મંત્રીએ શિવલિંગ પાસે હાથ ધોઇને સનાતન ધર્મનું અપમાન કર્યું છે. તેઓ મંત્રી પદ પર રહેવાને લાયક નથી. કોંગ્રેસના નેતા સુરેન્દ્ર રાજપુતે કહ્યું હતું કે સતીષ શર્માએ ભગવાન શિવનું અપમાન કર્યું છે. તેઓને તાત્કાલીક મંત્રી પદેથી હટાવવામાં આવે. સમાજવાદી પાર્ટીના નેતા સુનિલ સિંઘે કહ્યું હતું કે જો આ કૃત્ય કરનારા નેતા અન્ય જાતિના હોત તો તેમને મુખ્યમંત્રી યોગી આદિત્યનાથે ક્યારના કાઢી મુક્યા હોત. સતીષ શર્માએ રાજીનામુ આપી દેવું જોઇએ. વિવાદ વચ્ચે મંદિરના પૂજારીએ કહ્યું હતું કે જે સ્થળે પૂજા કરવામાં આવી હોય ત્યાં જ હસ્તપ્રક્ષાલન કરવાનું હોય છે.

from Top Stories News - Gujarat Samachar : World's Leading Gujarati Newspaper https://ift.tt/LeKvrH1
via IFTTT