HEC સામે નાણાકીય સંકટ, કર્મીઓને મહિનાઓથી નથી ચૂકવ્યો પગાર! ISROના મિશનોમાં ભજવી છે ભૂમિકા

Image : IANS

આકાશને સ્પર્શવાના દેશના તમામ વૈજ્ઞાનિક મિશનોમાં ભાગીદાર જાહેર ક્ષેત્રની કંપની HEC (હેવી એન્જિનિયરિંગ કોર્પોરેશન) ના આશરે 3200 અધિકારીઓ- કર્મચારીઓને છેલ્લા 17-18 મહિનાથી પગાર જ નથી મળ્યો. ચંદ્રયાન-3 બાદ શનિવારે જ્યારે દેશના પ્રથમ સૂર્ય મિશન આદિત્ય એલ-1ના સ્પેસ ક્રાફ્ટે આકાશમાં ઉડાન ભરી તો રાંચી સ્થિત HECના કર્મચારીઓ પર ખુશીથી ઝૂમી ઊઠ્યાં હતાં. 

મહત્ત્વના પાર્ટ્સ HECના પ્લાન્ટ્સમાં જ તૈયાર થયા હતા 

આ સ્પેસક્રાફ્ટ માટે હોરિજોન્ટલ સ્લાઈડિંગ ડૉર, ફોલ્ડિંગ કમ વર્ટિકલ રિપોઝિશનલ પ્લેટફોર્મ, મોબાઈલ લોન્ચિંગ પેડ, ટેન ટી હેમર હેડ ટાવર ક્રેનનું નિર્માણ આ જ કારખાનામાં થયું છે. આ ઉપકરણોનું નિર્માણ જોવા માટે ઈસરોની ટીમે તાજેતરમાં જ HECની મુલાકાત લીધી હતી. 

કર્મચારીઓએ કરી સરકારને અપીલ 

HECના એક એન્જિનિયર ગૌરવ સિંહે કહ્યું કે  HECના તમામ કર્મચારીઓને ગર્વ છે કે ચંદ્રના તમામ અભિયાનો બાદ સૂર્ય માટે દેશના આ મિશનમાં પણ અમે ભાગીદાર બન્યા છીએ. સરકારને અમારો આગ્રહ છે કે દેશના નવનિર્માણમાં ભાગીદાર રહેલી આ સંસ્થાને બદહાલીથી બચાવી લે.  

HEC વર્કિંગ કેપિટલના ગંભીર સંકટ સામે ઝઝૂમી રહી છે

HECની સૌથી મોટી યુનિયન હટિયા પ્રોજેક્ટ વર્કર્સ યુનિયનના મહામંત્રી રાણા સંગ્રામ સિંહ કહે છે કે મધર ઓફ ઓલ ઈન્ડસ્ટ્રીઝ તરીકે પ્રસિદ્ધ HECની આ હાલત મિસમેનેજમેન્ટને કારણે થઈ છે. તેના ઈન્ચાર્જ સીએમડી નલિન સિંઘલ ક્યારેય HEC તરફ જોતા જ નથી. ત્રણ ડિરેક્ટર્સ છે, તે પણ અઠવાડિયામાં એક કે બે જ દિવસ આવે છે. કરાર આધારિત કર્મચારીઓ સાથે સાવકું વર્તન થાય છે. એક તો મહિનાઓનો પગાર બાકી છે બીજી બાજુ તેમને કામથી હટાવવાનું કાવતરું થઈ રહ્યું છે. કેન્દ્ર સરકારે તાત્કાલિક ધોરણે આ ગૌરવશાળી સંસ્થાનને બચાવવા પહેલ કરવી જોઈએ. છેલ્લા બે ત્રણ વર્ષોથી HEC વર્કિંગ કેપિટલના ગંભીર સંકટ સામે ઝઝૂમી રહી છે. કર્મચારીઓ પગાર માટે સતત આંદોલન કરી રહ્યા છે. 

from Top Stories News - Gujarat Samachar : World's Leading Gujarati Newspaper https://ift.tt/exs63B9
via IFTTT