કેજરીવાલે ઘરનાં રિનોવેશન પાછળ રૂ. 45 કરોડ ખર્ચાયા : સીબીઆઇએ તપાસ શરૂ કરી
- દિલ્હી સીએમની મુશ્કેલી વધવાના એંધાણ
- દિલ્હી સરકારના પીડબ્લ્યુડી વિભાગ પાસેથી સીએમ હાઉસના રિનોવેશન સંબધી દસ્તાવેજ ૩ ઓક્ટોબર સુધી જમા કરાવવાનો સીબીઆઇનો આદેશ
- ભાજપ ગમે તેટલી તપાસ કરાવી લે અગાઉ પણ કંઇ નીકળ્યું ન હતું અને આગળ પણ કંઇ નહીં નીકળે : આમ આદમી પાર્ટી
નવી દિલ્હી : સીબીઆઇએ દિલ્હીના મુખ્યપ્રધાન અરવિંદ કેજરીવાલના સત્તાવાર નિવાસ સ્થાનના રિનોવેશનમાં નિરર્થક ખર્ચ અથવા નાણાકીય અનિયમિતતાઓની તપાસ શરૂ કરી દીધી છે. રિપોર્ટ અનુસાર સીબીઆઇએ દિલ્હી સરકારના પીડબ્લ્યુડી વિભાગ પાસેથી સીએમ હાઉસના રિનોવેશન સંબધી તમામ દસ્તાવેજ ૩ ઓક્ટોબર સુધી જમા કરાવવાનો આદેશ આપ્યો છે.
ઉલ્લેખનીય છે કે મુખ્યપ્રધાનના નિવાસ સ્થાનમાં લગભગ ૪૫ કરોડ રૂપિયાનો ખર્ચ થયો હતો. આ દરમિયાન આમ આદમી પાર્ટીએ જણાવ્યું છે કે ભાજપ ગમે તેટલી તપાસ કરાવી લે અગાઉ પણ કંઇ નીકળ્યું ન હતું અને આગળ પણ કંઇ નહીં નીકળે.
ચાલુ વર્ષે મે મહિનામાં દિલ્હીના એલજી વી કે સકસેનાએ સીબીઆઇ ડાયરેક્ટરને પત્ર લખી તપાસની માગ કરી હતી. ગૃહ મંત્રાલયે દિલ્હી મુખ્યપ્રધાન નિવાસ સ્થાનમાં કથિત કૌભાંડમાં સીબીઆઇ તપાસના આદેશ આપ્યા છે. આ કેસમાં ગૃહ મંત્રાલય દ્વારા અગાઉ જ કેગ દ્વારા એક વિશેષ ઓડિટનો આદેશ આપવામાં આવ્યો છે.
કોંગ્રેસે પણ કેજરીવાલની ટીકા કરતા જણાવ્યું હતું કે તેમના સત્તાવાર નિવાસ સ્થાનમાં ખર્ચ કરવામાં આવેલી રકમ ૪૫ કરોડ રૂપિયા નહીં પણ ૧૭૧ કરોડ રૂપિયા હતી.
દિલ્હી ભાજપે પણ દિલ્હી મુખ્યપ્રધાન નિવાસસ્થાન અંગે અનેક આરોપ મૂક્યા છે. ભાજપના જણાવ્યા અનુસાર કોરોનાના સમયમાં અરવિંદ કેજરીવાલે પોતાના ઘર અને ઓફિસમાં ૪૫ કરોડ રૂપિયાનો ખર્ચ કર્યો હતો. જે તેમની સંવેદનહીનતા દર્શાવે છે. ભાજપ પ્રવક્તા સંબિત પાત્રાએ જણાવ્યું હતું કે કેજરીવાલના ઘર માટે ખરીદવામાં આવેલા આઠ પડદાઓ પૈકી એકની કીંમત ૭.૯૪ લાખ રૂપિયા હતી જ્યારે સૌથી સસ્તા પડદાની કીંમત ૩.૫૭ લાખ રૂપિયા હતી. તેમણે વધુમાં જણાવ્યું હતું કે વિયેતનામથી ૧.૧૫ કરોડ રૂપિયાના માર્બલ મંગાવવામાં આવ્યા હતાં. પૂર્વ નિર્મિત લાકડાની દીવાલો પર ચાર કરોડ રૂપિયાનો ખર્ચ કરવામાં આવ્યો હતો.
દિલ્હી ભાજપ પ્રમુખ વિરેન્દ્ર સચદેવે સીએમ અરવિંદ કેજરીવાલના શાનદાર રાજમહેલની સીબીઆઇ તપાસ શરૂ થવાનું ભાજપ સ્વાગત કરે છે.
from Top Stories News - Gujarat Samachar : World's Leading Gujarati Newspaper https://ift.tt/dy90p3V
via IFTTT
ટિપ્પણીઓ નથી: