ડમી ઉમેદવાર કાંડ મામલે યુવરાજસિંહને ભાવનગર પોલીસનું તેડું, આવતીકાલે નિવેદન નોંધાવવુ પડશે

ભાવનગરઃ ડમી ઉમેદવાર કાંડ મામલે આમ આદમી પાર્ટીના નેતા યુવરાજસિંહ જાડેજાને ભાવનગર પોલીસે સમન્સ પાઠવ્યું છે. ભાવનગર પોલીસે યુવરાજસિંહને પૂછપરછ માટે હાજર થવા જણાવ્યું છે. યુવરાજસિંહને પોલીસ સમક્ષ નિવેદન નોંધાવવું પડશે તેમજ આવતીકાલે બપોરે 12 વાગ્યા સુધીમાં ભાવનગર પોલીસ સમક્ષ હાજર થવું પડશે. પોલીસે યુવરાજસિંહને કલમ 160 મુજબ સમન્સ પાઠવ્યું છે. એસઓજી ખાતે હાજર થઈને ડમી કાંડ મુદ્દે નિવેદન નોંધાવવું પડશે. 

ડમીકાંડ મામલે તપાસનો ધમધમાટ શરૂ કરી દેવાયો
ડમી ઉમેદવાર કાંડ મામલે પ્રેસ કોન્ફરન્સમાં કેટલીક વ્યક્તિના નામ ન આપવા બદલ નાણાંકીય વ્યવહાર કર્યા હોવાનો આક્ષેપ કર્યો હતો. આ મામલે યુવરાજસિંહને હાજર રહીને નિવેદન નોંધાવવા માટે સમન્સ પાઠવ્યું છે.  આ ઉપરાંત ડમીકાંડ મામલે તપાસનો ધમધમાટ શરૂ કરી દેવામાં આવ્યો છે. એક વ્યક્તિને પૂછપરછ માટે બોલાવવામાં આવ્યો છે. તળાજાથી તલાટીને પૂછપરછ માટે બોલાવવામાં આવ્યા છે. શિક્ષણ ઉપરાંત વનવિભાગ અને પંચાયત વિભાગમાં પણ કાંડના પડઘા પડ્યા છે.

બિપિન ત્રિવેદીએ શું કહ્યું હતું
એક ડીલ અંગે બિપિન ત્રિવેદીએ જણાવ્યું હતું કે, પ્રદીપ નામના વ્યક્તિએ મને જણાવ્યું હતું કે યુવરાજસિંહ વારંવાર મારું નામ લે છે, જેના કારણે પોલીસ મારા ઘરે આવે છે. જેથી તમે વાત કરો. આ અંગે મેં યુવરાજસિંહને વાત કરી હતી. જે બાદ મેં પ્રદીપ અને ઘનશ્યામ ભાઈ, શિવુભા અને યુવરાજ સિંહે એક મીટિગ કરી હતી. જે બાદ મારે 2 વાગ્યે લેક્ચર હોવાથી હું ત્યાંથી નીકળી ગયો હતો. લેક્ચર પૂરો થયા પછી મને જાણવા મળ્યું કે આ ડીલ 55 લાખમાં થઈ હતી. 

યુવરાજસિંહે તમામ આરોપોને પાયાવિહોણા ગણાવ્યા
આ પેમેન્ટ આપવા માટે ઘનશ્યામભાઈ જુદા-જુદા ત્રણ તબક્કામાં ગયા. આ વખતે હું સાથે નહોતો. આમાં હું ક્યાંય સામેલ નહોતો. મેં ઘનશ્યામ ભાઈને કીધું કે આમાં મને ક્યાંય સામેલ કરતા નહીં, આ બધું લાંબુ ચાલે. યુવરાજસિંહના બે સાળા પણ આ ડીલમાં સામેલ હતા.પ્રદીપ બારૈયા નામના આરોપીનું નામ સામે આવવાનું હતું. પરંતુ ઘનશ્યામ, બિપિન, પ્રદીપ, શિવુભા, કાનભા અને યુવરાજસિંહની બેઠક થઈ હતી છે અને ડીલ 55 લાખમાં થઈ હતી. આ 55 લાખ રૂપિયાની ડીલમાં 30 લાખ, 20 લાખ અને 5 લાખ રૂપિયા ત્રણ હપ્તામાં આપવામાં આવ્યા હતા. જોકે, યુવરાજસિંહ જાડેજાએ તમામ આરોપોને પાયાવિહોણા ગણાવ્યા હતા.

from Top Stories News - Gujarat Samachar : World's Leading Gujarati Newspaper https://ift.tt/OT6ViyH
via IFTTT