મહાદેવ બુક માટે ગુજરાતમાંથી જ ૧૦ હજારથી વધારે બેંક એકાઉન્ટ ખોલાયા

અમદાવાદ, શનિવાર

અમદાવાદમાં ઝડપાયેલા ક્રિકેટ સટ્ટાબેટિંગ નેટવર્કમાં મહાદેવ બુકની ઉર્ફે  સૌરભ ચંદ્રાકરનું નામ બહાર આવ્યા બાદ  એક પછી એક ખુલાસા થઇ રહ્યા છે. જેમાં  મહાદેવ બુક માટે કામ કરતા બુકીઓએ ગેરકાયદેસર રીતે આવતા નાણાંને કાયદેસર બનાવવા માટે પાંચસો કે હજાર નહી પણ ગુજરાતમાંથી ૧૦ હજારથી વધારે બેંક એકાઉન્ટ ખોલાવ્યા હતા.  જેમાં મોેટાભાગના બેંક એકાઉન્ટ ભાડા આપીને ચલાવવામાં આવતા હતા. જ્યારે  બેંક એકાઉન્ટના આર્થિક વ્યવહારની લિમિટ પુરી થતી ત્યારે તે બેંક એકાઉન્ટનો ઉપયોગ બંધ કરી દેવામાં આવતો હતો.  આ સમગ્ર કૌભાંડ બેેકના કર્મચારીઓની સંડોવણી સાથે સુવ્યવસ્થિત રીતે ચલાવવામાં આવે છે. પીસીબીએ માધુપુરામાં  સટ્ટા બેટિંગના ગુજરાતના સૌથી મોટા કૌભાંડનો પર્દાફાશ કર્યો છે. જેમાં આ કેસના તાર દુબઇથી ભારતનો સૌથી મોટો સટ્ટો રમતા મહાદેવ બુકી ઉર્ફે સૌરભ ચંદ્રાકર સાથે જોડાયેલા હોવાનું બહાર આવ્યું છે.  હર્ષિત જૈનની ઓફિસમાંથી પોલીસે ૫૩૦ જેટલા બેંક એકાઉન્ટની વિગતો મેળવી હતી. પરતુ,  મહાદેવ બુકીને સટ્ટા બેટિંગના નેટવર્કને ચલાવવા માટે હજારો બેંક એકાઉન્ટની જરૂરિયાત રહેતી હતી. જેથી તેના માટે ફ્રન્ચાઇઝી પેટર્નથી કામ કરતા બુકીઓએ બેંક એકાઉન્ટ ખોલાવવા માટે  અલગ ટીમ બનાવી હતી. જે ગ્રામ્ય વિસ્તારોમાં જઇને પાંચ હજારનું માસિક ભાડુ આપવાનું કહીને બેંક એકાઉન્ટ ખોલાવવા માટે દસ્તાવેજો લેવાની સાથે તે વ્યક્તિના નામે સીમ કાર્ડ પણ લઇ લેતા હતા. જે બેંક એકાઉન્ટ સાથે જોડાયેલા મોબાઇલ નંબરનું રહેતું હતું. બાદમાં બેંકના ચોક્કસ એક્ઝીક્યુટીવ પાસેથી બેંક એકાઉન્ટ ખોલાવીને તેની  ચેકબુક અને ડેબિટ કાર્ડ તેમજ પીન નંબરની વિગતો મુળ એકાઉન્ટ હોલ્ડરને ત્યાં કુરીયર થાય તે પહેલા જ ેબેંકમાંથી લઇ લેતા હતા.  આ માટે ખાનગી બેકને પસંદ કરવામાં આવતી હતી. કારણ કે બેંકોને એકાઉન્ટ ઓપન કરવાના ટારગેટ હોય છે ત્યારે એક સાથે ૧૦૦ જેટલા એકાઉન્ટ ખુલતા હોવાથી બેંકને ટારગેટ પૂર્ણ કરવાનું મહત્વનું બની જતું.  સાથેસાથે  એક બેંક એકાઉન્ટમાં આર્થિક વ્યવહારની મર્યાદા નવ લાખ જેટલી હોય તે પૂર્ણ થતા જ આ બેંક એકાઉન્ટનો બંધ કરી દેવામાં આવતો હતો. સુત્રોના જણાવ્યા મુજબ મહાદેવ બુકી માટે ગુજરાતમાં જ તેના માટે કામ કરતા બુકીઓએ ૧૦ હજારથી વધારે બેંક એકાઉન્ટ ખોલાવ્યા હતા.ત્યારે પોલીસ તપાસમાં બેંકોના એક્ઝીક્યુટીવથી લઇને મોટા અધિકારીઓના નામ પણ બહાર આવી શકે તેમ છે.

from Top Stories News - Gujarat Samachar : World's Leading Gujarati Newspaper https://ift.tt/K03CA7I
via IFTTT