સામાન્ય પ્રજા માટે 100ની મર્યાદાને લીધે હવે લગ્નોનું પણ લાઇવ પ્રસારણ

સુરત તા- 1 ડિસેમ્બર 2020  મંગળવાર

કોરોનાનાં કારણે દરેક તહેવાર-ઉત્સવોની ઉજવણી ફિક્કી થઇ ગઇ છે. તહેવારો સાથે પ્રસંગો પણ કોરોનાનો ભોગ બની રહ્યા છે. જેમાં જીવનનો સૌથી મહત્વનો અને યાદગાર ગણાતો લગ્ન પ્રસંગ પણ અટવાઇ ગયો છે. ૧૦૦ વ્યક્તિની મર્યાદાને પગલે  કેટલાક લગ્નનું લાઇવ પ્રસારણ કરીને તમામને ઓનલાઇન હાજરી આપવાની રીત અપનાવી રહ્યા છે.

લગ્ન માટે સંખ્યા નિર્ધારિત હોવાથી લગ્નમાં એક નવો ટ્રેન્ડ સામે આવ્યો છે. હવે લગ્નનું પણ લાઇવ પ્રસારણ થઇ રહ્યુ છે. સુરતમાં તા-૯મી ડિસેમ્બરે ડોક્ટર યુગલનાં લગ્ન થવાના છે. અગાઉ તેમના પરિવારમાં થયેલા લગ્ન ભવ્યતાથી ભરેલા હતા. હજારોની સંખ્યામાં સગા સંબંધીઓ હાજર રહી આશીર્વાદ આપતા અને લગ્નની તમામ રસમો પણ ખુબ ઝાકમઝોળ સાથે થતી હતી  પણ આ વખતે કોરોનાને કારણે અને બંને યુગલ પણ ડોક્ટર હોવાથી જાગૃત નાગરિકની ફરજ બજાવવાના ભાગરૃપ પણ ગાઇડલાઇનનું પાલન કરશે.

લગ્નમાં ૫૦થી ઓછા લોકોની હાજરી રહેશે અને લગ્નનું યુ ટયુબ પર લાઇવ પ્રસારણ કરાશે. ડીજીટલ કંકોતરીમાં યુ ટયુબની લિંક પણ આપી દેવાઇ છે. અને સ્નેહીજનોને ફોન કરીને પણ યુ ટયુબ પર લગ્ન જોઇને આશિર્વાદ આપવા જણાવી દીધુ છે. આ લગ્ન સિવાય પણ શહેરમાં ઘણા બધા લગ્નો થઇ રહ્યા છે જેનું યુ ટયુબ અને ફેસબુક પર સ્પેશિયલ પેઇજ બનાવાયું છે. કતારગામમાં પણ આ જ દિવસે એક લગ્ન થવાના છે જેમાં વરરાજાનાં પિતાએ કહ્યુ કે ૧૦૦ વ્યક્તિમાં કોને કહેવુ અને કોને ના પાડવી એ મોટુ ધરમસંકટ હતુ તેથી પુત્રએ કહ્યુ કે આપણે ફેસબુક પર લાઇવ કરીને સોને આંમંત્રણ આપી દઇએ. જ્યારે લગ્નમાં એકદમ નજીકના ૪૦ જેટલા લોકો હાજર રહેશે. આ ઉપરાંત પણ ઘણા લોકો આ નવી રીત પ્રમાણે લગ્નવિધિ કરવાના મૂડમાં છે.

from Top Stories News - Gujarat Samachar : World's Leading Gujarati Newspaper https://ift.tt/33BrAeJ
via IFTTT