રાજસ્થાનમાં પંચાયતોની ચૂંટણીમાં કોંગ્રેસ નિષ્ફળ નીવડી, 21 જિલ્લાની 4,371 બેઠકોની હતી ચૂંટણી

- જેની સરકાર હોય એ જીતે એવી મીથ તૂટી

જયપુર તા.9 ડિસેંબર 2020 બુધવાર

રાજસ્થાનમાં થયેલી પંચાયતોની ચૂંટણીમાં કોંગ્રેસનો વ્યૂહ સફળ થયો નથી એવી છાપ પ્રગટ થયેલાં પરિણામો જોતાં પડતી હતી.

કુલ 21 જિલ્લાની ચાર હજાર ત્રણસો એકોતેર બેઠકોની ચૂંટણી હતી. આ ચૂંટણીએ ઘણી મીથ તોડી હતી. સૌથી મોટી મીથ એ હતી કે રાજ્યમાં જે પક્ષની સરકાર હોય એ સદૈવ જીતે છે. આ વખતે એવું બન્યું નથી. પ્રગટ થયેલાં 4,051 પરિણામોમાં કોંગ્રેસે અત્યાર સુધીમાં માત્ર 1,718 બેઠકો મેળવી હતી જ્યારે ભાજપે 1,835 બેઠકો જીતી લીધી હતી.

સદૈવ બનતું આવ્યું છે એમ રાજસ્થાન કોંગ્રેસના આંતરિક વિખવાદોએ અહીં પણ એની અસર દેખાડી હતી. અશોક ગેહલોત આત્મવિશ્વાસના એવા અતિરેકમાં રહ્યા કે બધી બેઠકો કોંગ્રેસ જીતી જશે. પરંતુ એવું બન્યું નથી. રાજ્ય ચૂંટણી પંચે આપેલી માહિતી મુજબ 420 અપક્ષો અને 56 બેઠકો અજિત સિંઘના રાષ્ટ્રીય લોક દળ (રાલોદ-આરએલપી) એ જીતી લીધી હતી.

એજ પરિસ્થિતિ જિલ્લા પરિષદોમાં પણ સર્જાઇ હતી. ભાજપે 266, કોંગ્રેસે 204 અને રાલોદે પાંચ બેઠકો જીતી લીધી હતી. જિલ્લા પરિષદોના કુલ 636 સભ્યોની ચૂંટણી કરવાની હતી.

દરમિયાન, સિકર જિલ્લાના ફતેહપુર સદર પોલીસ સ્ટેશનની હદમાં વિજેતા જૂથે કાઢેલા વિજય સરઘસમાં હરીફ જૂથ સાથે થયેલી અથડામણમાં એક યુવકનું મોત નીપજ્યું હતું અને બીજા કેટલાકને ઇજા થઇ હતી.

from Top Stories News - Gujarat Samachar : World's Leading Gujarati Newspaper https://ift.tt/33XadoF
via IFTTT