કોઇ ચર્ચા નહીં, કાયદો રદ કરો : ખેડૂતોનું સરકારને અલ્ટિમેટમ

ખેડૂતો વતી 35 જેટલા સંગઠનોના પ્રતિનિધિ અને કેન્દ્રીય મંત્રી તોમર, ગોયલ, સોમ પ્રકાશ વચ્ચે બેઠકનો પ્રથમ રાઉન્ડ, બીજી બેઠક ત્રીજીએ

ઉત્તર પ્રદેશમાંથી વધુ 500 ખેડૂતો દિલ્હી આંદોલનમાં જોડાશે, દિલ્હીની મોટા ભાગની બોર્ડર પર પોલીસે તૈનાતી વધારી

નવી દિલ્હી, તા. 1 ડિસેમ્બર, 2020, મંગળવાર

કેન્દ્ર સરકારના કૃષિ કાયદાઓના વિરોધમાં ખેડૂતોએ દિલ્હીમાં શરૂ કરેલું મોટુ આંદોલન છઠ્ઠા દિવસમાં પ્રવેશ્યું છે. આ સિૃથતિ વચ્ચે ભીસમાં આવેલી સરકાર ખેડૂતોને વાટાઘાટો માટે આમંત્રણ આપી રહી છે અને કેટલાક ખેડૂતોની સાથે વાતચીત પણ કરી રહી છે.

ખેડૂતો અને સરકાર વચ્ચેની વાટાઘાટોનો પ્રથમ રાઉન્ડ નિષ્ફળ રહ્યો છે. ખેડૂતોએ સરકારને સ્પષ્ટ કહી દીધુ છે કે કાયદા રદ કરો તે સિવાય બીજી કોઇ જ વાતચીત કરવામાં નહીં આવે. ખેડૂતોને મનાવવાનો કેન્દ્ર સરકાર પ્રયોસ કરી રહી છે જ્યારે ખેડૂતોની સ્પષ્ટ વાત છે કે જ્યાં સુધી આ નવા કૃષિ કાયદાઓને રદ નહીં કરો ત્યાં સુધી આંદોલન શરૂ રહેશે.

પ્રથમ રાઉન્ડમાં કેન્દ્ર સરકારે ખેડૂતોની માગણીઓને ધ્યાનમાં રાખીને એક કમિટીની રચના કરીશું તેવી ખાતરી ખેડૂતોને આપી હતી. જોકે તેનેો અસ્વીકાર કરવામાં આવ્યો છે. બીજી તરફ હવે આગામી ત્રણ તારીખે સરકાર ફરી વાટાઘાટોનો પ્રયાસ કરશે. 

પ્રથમ રાઉન્ડમાં ખેડૂત સંગઠનો તરફથી 35થી વધુ પ્રતિનિિધઓ સામેલ થયા હતા. જ્યારે સરકાર તરફથી કેન્દ્રીય ગૃષિ પ્રધાન નરેન્દ્રસિંહ તોમર, કેન્દ્રીય મંત્રી પીયૂષ ગોયલ અને સોમ પ્રકાશ સામેલ થયા હતા. દરમિયાન વિવિધ પ્રેઝન્ટેશન દેખાડીને ખેડૂતોને સરકારે મનાવવાનો પ્રયાસ કર્યો હતો. 

જ્યારે વાતચીત માટે બેઠક યોજાઇ હતી ત્યારે મંત્રીઓએ ખેડૂત નેતાઓને મનાવવા માટે તેમની સાથે ચા પણ પીવાની ઓફર કરી હતી, જ્યારે ટી બ્રેક હતો ત્યારે મંત્રીઓએ આ પ્રયાસ કર્યો હતો.

જોકે ખેડૂતોએ સ્પષ્ટ શબ્દોમાં સરકારને રોકડુ પરખાવતા કહ્યું કે તમે લોકો અમારી સાથે ચા પીવા માટે દિલ્હીના સિંધુ બોર્ડર પર આવો અમે ત્યાં ચાનું લંગર પણ લગાવ્યું છે. ખેડૂતોએ મંત્રીઓની સાથે ચા પીવાની પણ ના પાડી દીધી હતી. બીજી તરફ ઉત્તર પ્રદેશના બુંદેલખંડના 500થી વધુ દિલ્હી ચલો પ્રદર્શનમાં સામેલ થયા હતા.

આ જાહેરાત બુંદેલખંડ કિસાન યુનિયન (બીકેયુ) દ્વારા કરવામાં આવી હતી. જોકે હવે વધુ પ્રમાણમાં ખેડૂતો દિલ્હીમાં પ્રવેશ ન કરે તેને ધ્યાનમાં રાખીને રાજ્યની સરહદોએ મોટી સંખ્યામાં પોલીસ ખડકી દેવામાં આવી છે. દરમિયાન હરિયાણાના અપક્ષ ધારાસભ્ય સોમબીર સાંગવાને ભાજપને જે ટેકો આપ્યો હતો તેને પરત લઇ લીધો છે, ખેડૂતોના સમર્થનમાં તેમણે આ પગલુ ભર્યું હતું. 

પદ્મશ્રી, અર્જૂન એવોર્ડ વીજેતા ખેલાડીઓ નારાજ 

ખેડૂતોના સમર્થનમાં અનેક પૂર્વ ખેલાડીઓ એવોર્ડ પરત કરશે

અમે ખેડૂતોનાં સંતાન, સરકારે અમારા વડીલોની પાઘડી માર મારી ફગાવી, એવોર્ડને શું કરવા છે?  

નવી દિલ્હી, તા. 1

ખેડૂતોના આંદોલનને હવે આમ નાગરિકોનું પણ સમર્થન મળવા લાગ્યું છે. અનેક પૂર્વ ખેલાડીઓએ પોતાને જે પણ એવોર્ડ મળ્યા હતા તેને ખેડૂતોના આંદોલનના સમર્થનમાં સરકારને પરત આપવાની જાહેરાત કરવામાં આવી છે. જેમાં કેટલાક પદ્મશ્રી અને અર્જૂન એવોર્ડથી પણ સન્માનિત કરાયા છે.  

જે પૂર્વ ખેલાડીઓ એવોર્ડ પરત કરવા જઇ રહ્યા છે તેમાં પદ્મશ્રી અને અર્જૂન એવોર્ડ વીજેતા કરતારસિંહ, અર્જુન એવોર્ડ વિજેતા બાસ્કેટબોલ પ્લેયર સજ્જનસિંહ ચીમા અને અર્જૂન એવોર્ડ વિજેતા હોકી પ્લેયર રાજબીર કૌરનો સમાવેશ થાય છે.  

આ ખેલાડીઓએ જાહેરાત કરી છે કે તેઓ આગામી પાંચમી તારીખે દિલ્હી જશે, ખેડૂતોના સમર્થનમાં પોતાને જે પણ એવોર્ડ સરકાર તરફથી મળ્યા છે તેને પરત કરશે. રાષ્ટ્રપતિ ભવનની બહાર જ અમે આ એવોર્ડ પરત કરી દઇશું તેવી જાહેરાત તેમણે કરી હતી. 

ખેલાડીઓએ કહ્યું હતું કે અમે ખેડૂતોની સંતાન છીએ, ખેડૂતો શાંતિથી આંદોલન કરી રહ્યા છે છતા તેમના પર વોટર કેનનનો મારો ચલાવવો અયોગ્ય છે. જો અમારા વડીલોની પાઘડી જ આ સરકાર ફગાવી દેતી હોય તો આવા એવોર્ડને અમારે શું કરવા છે?  

દિલ્હીની તિકરી બોર્ડર પર મોટી સંખ્યામાં મહિલાઓ 

કડકડતી ઠંડી વચ્ચે 15 હજાર મહિલા ખેડૂતો આંદોલનમાં સામેલ

અનેક મહિલાઓ જાતે ટ્રેક્ટર ચલાવી દિલ્હી પહોંચી, આંદોલનકારીઓ માટે ભોજન તૈયાર કર્યું 

નવી દિલ્હી, તા. 1

દિલ્હીના કૃષિ કાયદાના વિરોધમાં મહિલા ખેડૂતો અને તેમના સંતાનો પણ મેદાનમાં ઉતર્યા છે. પંજાબ-હરિયાણા અને અન્ય રાજ્યોમા મોટી સંખ્યામાંથી મહિલા ખેડૂતો દિલ્હી આવી રહી છે. વૃદ્ધાઓ સહિત આશરે 15 હજાર જેટલી મહિલાઓ આંદોલનમાં જોડાઇ છે. 

આ જાણકારી ભારતીય કિસાન યુનિયનના નેતા શિંગારાસિંહે આપી હતી. મહિલા ખેડૂતો બહુ જ મોટી સંખ્યામાં આ વખતે આંદોલનમાં જોડાઇ રહી છે. કેટલીક તસવીરો પણ વાઇરલ થઇ રહી છે જેમાં મહિલાઓ જાતે જ ટ્રેક્ટર ચલાવીને દિલ્હી તરફ જઇ રહી છે અને પાછળ ટ્રોલીમાં પણ મોટી સંખ્યામાં મહિલાઓ બેઠી છે. અનેક વૃદ્ધ મહિલાઓ પણ ચાલતા ચાલતા આંદોલનને ટેકો આપી રહી છે. 

દિલ્હીમાં મહિલાઓ હાલ મોટા તવા લગાવીને આંદોલનકારી સાથીઓ માટે ભોજન પણ તૈયાર કરી રહી છે. તિકરી બોર્ડર પર મોટી સંખ્યામાં મહિલા ખેડૂતો જોવા મળી રહી છે. એક 40 વર્ષીય મહિલાએ કહ્યું હતું કે અમને ઠંડીનો ડર નથી, અમે અમારા સાથીઓને કહી રહ્યા છીએ કે અમે તમારી સાથે છીએ, કેમ કે આ એક લાંબી લડત છે.

from Top Stories News - Gujarat Samachar : World's Leading Gujarati Newspaper https://ift.tt/3lujrii
via IFTTT