એનવી રમણા બનશે આગામી CJI, વર્તમાન ચીફ જસ્ટિસ બોબડેએ સરકારને મોકલ્યું નામ

- જસ્ટિસ બોબડે 23 એપ્રિલના રોજ રિટાયર થઈ રહ્યા છે

નવી દિલ્હી, તા. 24 માર્ચ, 2021, બુધવાર

સુપ્રીમ કોર્ટના જજ એનવી રમણા દેશના આગામી ચીફ જસ્ટિસ બનશે. વર્તમાન ચીફ જસ્ટિસ એસ.એ. બોબડેએ કાયદા મંત્રાલયને પોતાના ઉત્તરાધિકારીના નામની જાણકારી આપી દીધી છે. એસ.એ. બોબડે આગામી મહિને રિટાયર થઈ રહ્યા છે ત્યારે એક મહિના પહેલા જ તેમણે સરકારને જસ્ટિસ રમણાનું નામ સૂચવી દીધું છે. 

ચીફ જસ્ટિસ બોબડેને રિટાયર થવામાં એક જ મહિનો બાકી હોવાથી સરકારે નવા ચીફ જસ્ટિસની નિયુક્તિની પ્રક્રિયા શરૂ કરી દીધી છે. તેના ઉપક્રમે સીજેઆઈ પાસે તેમના ઉત્તરાધિકારીના નામની ભલામણ માંગવામાં આવી હતી. આ ભલામણને અનુસંધાને એસએ બોબડેએ આજે પોતાના ઉત્તરાધિકારી તરીકે એનવી રમણાના નામની ભલામણ કરી છે.

કેન્દ્રીય કાયદા મંત્રી રવિ શંકર પ્રસાદે રિટાયરમેન્ટને આરે ઉભેલા જસ્ટિસ બોબડેને પત્ર લખીને નવા સીજેઆઈના નામની ભલામણ કરવા કહ્યું હતું રવિશંકર પ્રસાદે જસ્ટિસ બોબડેને પુછ્યું હતું કે, 'તમારા પછી તમારૂં ઉત્તરાધિકારી કોણ હશે? દેશના 48મા મુખ્ય ન્યાયાધીશ તરીકે કોની નિયુક્તિ થશે?' ઉલ્લેખનીય છે કે, જસ્ટિસ બોબડે 23 એપ્રિલના રોજ રિટાયર થઈ રહ્યા છે. 

જસ્ટિસ એનવી રમણા હાલ સુપ્રીમ કોર્ટના સૌથી વરિષ્ઠ જજ છે. અત્યાર સુધીની પરંપરા પ્રમાણે જસ્ટિસ રમણા જ દેશના આગામી સીજેઆઈનું પદ ગ્રહણ કરવાના હતા. પરંપરા પ્રમાણે રિટાયરમેન્ટના આશરે એક મહિના પહેલા દેશના સેવારત મુખ્ય ન્યાયાધીશ રાષ્ટ્રપતિને પત્ર લખીને સુપ્રીમ કોર્ટના સૌથી વરિષ્ઠ ન્યાયાધીશને પોતાના ઉત્તરાધિકારી બનાવવાની ભલામણ કરે છે. 

સીજેઆઈ દ્વારા ગોપનીય પત્ર મળે તે સાથે જ સરકાર તમામ ફોર્માલિટી પૂરી કરીને મોસ્ટ સીનિયર જજને ચીફ જસ્ટિસના પદ પર નિયુક્ત કરી દે છે અને રાષ્ટ્રપતિ તેમને પદના શપથ ગ્રહણ કરાવે છે. ઈતિહાસમાં એક-બે વખત એવું પણ બન્યું છે કે સરકારે દખલ કરીને વરિષ્ઠતા ક્રમનું ઉલ્લંઘન કરીને કનિષ્ઠ જજને ચીફ જસ્ટિસ બનાવ્યા હોય. 

from Top Stories News - Gujarat Samachar : World's Leading Gujarati Newspaper https://ift.tt/3rguKO2
via IFTTT