ચીનને કાઉન્ટર કરવા માટે એશિયામાં સૈન્ય તૈનાતી વધારશે US, કર્યું ભારતનું સમર્થન

વોશિંગ્ટન, તા. 26 જૂન 2020, શુક્રવાર

એશિયામાં વધી રહેલી ચીનની દાદાગીરીને રોકવા માટે અમેરિકા એક મહત્વની રણનીતિ અને સૈન્ય નિર્ણય અંતર્ગત યુરોપમાંથી પોતાની સેના હટાવીને એશિયામાં તૈનાત કરવા જઈ રહ્યું છે. અમેરિકાના વિદેશ મંત્રી માઈક પોમ્પિયોએ જણાવ્યું કે, ભારત અને દક્ષિણ પૂર્વ એશિયાઈ દેશો સામે વધી રહેલા ચીનના જોખમને ધ્યાનમાં રાખીને અમેરિકા યુરોપમાંથી પોતાના સૈનિકોની તૈનાતી ઘટાડીને તેમને યોગ્ય જગ્યાઓએ તૈનાત કરવા જઈ રહ્યું છે. 

અમેરિકા જર્મનીમાંથી પોતાની સેના શા માટે હટાવી રહ્યું છે તેવા સવાલના જવાબમાં માઈક પોમ્પિયોએ જણાવ્યું કે, અમેરિકી સેના જર્મનીમાં નથી કારણ કે તેમને અન્ય સ્થળે મોકલવામાં આવી રહી છે. 

એશિયાઈ દેશો માટે જોખમી બન્યું ચીન

પોમ્પિયોના કહેવા પ્રમાણે ચીનની સત્તાધારી કોમ્યુનિસ્ટ પાર્ટીના પગલા તે ભારત સામે પડકાર હોવાનું દર્શાવે છે. વધુમાં કહ્યું કે, ચીન વિયેતનામ માટે જોખમી છે તથા મલેશિયા, ઈન્ડોનેશિયા અને દક્ષિણ ચીની સમુદ્રમાં ચીન એક પડકાર છે. આ કારણે તેઓ સુનિશ્ચિત કરવા માંગે છે કે આ પડકારોનો સામનો કરવા માટે અમેરિકી સેના યોગ્યરૂપે તૈનાત રહે. 

હિંદ મહાસાગરમાં અમેરિકી સૈન્ય મથક

એશિયામાં હિંદ મહાસાગર ઉપરાંત જાપાન, દક્ષિણ કોરિયા અને ફિલિપિન્સમાં અમેરિકી સૈન્યનું મથક છે. ગાલવાન ઘાટીમાં ચીન અને ભારત વચ્ચે હિંસક અથડામણ થઈ ત્યાર બાદ અમેરિકાની આ ટિપ્પણી સામે આવી છે. પોમ્પિયોએ ગત સપ્તાહે ભારત સાથેનો તણાવ વધારવા અને દક્ષિણ ચીની સાગરના લશ્કરીકરણ માટે ચીની સેનાની ટીકા કરી હતી અને ચીની કોમ્યુનિસ્ટ પાર્ટીને બિનજવાબદાર પણ ગણાવી હતી. 

પોમ્પિયોએ જણાવ્યું કે, 'પીએલએ એ વિશ્વની સૌથી મોટી લોકશાહી ભારત સાથે સરહદ વિવાદ વધારી દીધો છે. તે દક્ષિણ ચીની સમુદ્રનું લશ્કરીકરણ કરી રહ્યું છે, ગેરકાયદેસર રીતે ત્યાં કબજો જમાવી રહ્યું છે અને મહત્વના દરિયાઈ માર્ગોને નુકસાન પહોંચાડી રહ્યું છે.'

જેથી અમે પીએલએનો સામનો કરી શકીએ..

બ્રુસેલ્સ ફોરમ 2020માં વર્ચ્યુઅલ રીતે હાજરી આપતી વખતે પોમ્પિઓએ જણાવ્યું કે તેઓ પીએલએનો સામનો કરી શકે તે રીતે તૈનાતી સુનિશ્ચિત કરવા જઈ રહ્યા છે. આ અમારા સમયની મુશ્કેલી છે અને અમે પૂરતા પ્રયત્ન કરીશું કે અમારા પાસે તેનો સામનો કરવા તમામ સંસાધનો ઉપસ્થિત રહે. ઉલ્લેખનીય છે કે રાષ્ટ્રપતિ ડોનાલ્ડ ટ્રમ્પના નિર્દેશ પર અમેરિકા સૈનિકોની તૈનાતીની સમીક્ષા કરી રહ્યું છે અને જર્મનીમાં પોતાના સૈનિકોની સંખ્યા આશરે 52,000થી ઘટાડીને 25,000 કરી રહ્યું છે. 

from Top Stories News - Gujarat Samachar : World's Leading Gujarati Newspaper https://ift.tt/2CJtpM3
via IFTTT