20 હજાર કરોડના નવા સંસદ ભવન પ્રોજેક્ટના કામને સુપ્રીમે અટકાવ્યું

નવી દિલ્હી, તા. 7 ડિસેમ્બર, 2020, સોમવાર

નવા સંસદ ભવન નિર્માણ વાળા સેંટ્રલ વિસ્ટા પ્રોજેક્ટને લઇને સુપ્રીમ કોર્ટે સોમવારે આક્રામક રીતે કેન્દ્ર સરકારને ઝાટકણી કાઢી હતી. સુપ્રીમે કહ્યું હતું કે જ્યાં સુધી આ મામલે ચુકાદો ન આપીએ ત્યાં સુધી કોઇ જ નિર્માણ કામ ન કરવામાં આવે. સોલિસિટર જનરલ તુષાર મેહતાને કહ્યું કે તમે પ્રેસ રિલીઝ કરીને નિર્માણ કામની તારીખો પણ જાહેર કરી દીધી, જ્યારે કોર્ટે કહ્યું છે કે હાલ તેના પર કોઇ જ કામ નહીં કરવામાં આવે. 

સુપ્રીમ કોર્ટે સાથે એમ પણ કહ્યું કે શિલાન્યાસથી અમને કોઇ જ વાંધો નથી, પણ નિર્માણનું કોઇ જ કામ હાલ આગળ વધારવામાં નહીં આવે. સુપ્રીમ કોર્ટની સખતીને કારણે કેન્દ્ર સરકાર ઝુકી ગઇ છે, સેંટ્રલ વિસ્ટા પ્રોજેક્ટમાં હાલ કોઇ જ કામ નહીં કરીએ તેવી કેન્દ્રએ સુપ્રીમ કોર્ટને ખાતરી આપવી પડી છે.

કેંદ્રએ કોર્ટમાં કહ્યું છે કે માત્ર શિલાન્યાસ કરીશું કોઇ નિર્માણ કામ નહીં કરીએ. સોલિસિટર જનરલ તુષાર મહેતાએ કહ્યું કે કોઇ તોડફોડ નહીં કરીએ કે વૃક્ષો નહીં કાપીએ. શરૂઆતમાં જ કોર્ટે કહી દીધુ હતું કે અમે આ કામના નિર્માણ પણ સ્ટે નથી આપી રહ્યા પણ માત્ર હાલ પુરતા કામ ન કરવા કહી રહ્યા છીએ. 

કોર્ટે કહ્યું કે એક વખત આ સમગ્ર મામલે નિર્ણય આવી જાય તે બાદ નિર્માણ કામ કરવામા આવે પણ ત્યાં સુધી કોઇ જ તોડફોડ કે વૃક્ષો કાપવાનું કામ નહીં કરવામાં આવે જે મુદ્દે કેન્દ્ર સરકારે સહમતી વ્યક્ત કરી હતી. 20 હજાર કરોડના સેંટ્રલ વિસ્ટા પ્રોજેક્ટમાં સોમવારે સુપ્રીમ કોર્ટમાં સુનાવણી થઇ હતી,

સુપ્રીમ કોર્ટે કેન્દ્ર સરકારને કહ્યું હતું કે અમે આ મામલાને લિસ્ટ કર્યું છે કેમ કે કેટલુક કામ પબ્લિક ડોમેનમાં આવ્યું છે. એ યોગ્ય છે કે પ્રોજેક્ટ પર કોઇ જ રોક નહી લગાવીએ પણ તેનો મતલબ એ નથી કે તમે નિર્માણ કામ શરૂ કરી દો. સુપ્રીમ કોર્ટે પોતાનો પક્ષ રાખવા માટે સરકાર વતી હાજર સોલિસિટર જનરલ તુષાર મહેતાને પાંચ મિનિટનો સમય આપ્યો હતો.

from Top Stories News - Gujarat Samachar : World's Leading Gujarati Newspaper https://ift.tt/3oJX1f5
via IFTTT