માત્ર ઉઈગર મુસ્લિમો જ નહીં, ચીનમાં આ શાંતિપ્રિય સમુદાય સાથે પણ થતી આવી છે હિંસા

- ફાલુન ગોંગ સમુદાયના કેદીઓના શરીરમાંથી અંગો કાઢીને બ્લેક માર્કેટમાં વેચાણનો ધીકતો ધંધો

નવી દિલ્હી, તા. 13 માર્ચ, 2021, શનિવાર

ચીનની વિસ્તારવાદી પ્રવૃત્તિને લઈ સમગ્ર વિશ્વના દેશો સચેત બન્યા છે. ઉપરાંત ચીનના શિનજિયાંગ પ્રાંતમાં ઉઈગર મુસ્લિમો સાથે હિંસાના સમાચાર પણ વિવિધ દેશોને ગુસ્સો અપાવી રહ્યા છે. અમેરિકી વિદેશ મંત્રી એન્ટની બ્લિંકને તાજેતરમાં જ આ મામલે ચીનને ચેતવણી આપી હતી. જો કે, માત્ર ઉઈગર મુસ્લિમો જ નહીં, ચીન ફાલુન ગોંગ નામના અન્ય એક શાંતિપ્રિય સમુદાયને પણ હિંસાનો ભોગ બનાવતું આવ્યું છે. એટલે સુધી કે ચીની સરકારે આ સમુદાયને શૈતાની ધર્મ ગણાવીને તેના પર સંપૂર્ણપણે પ્રતિબંધ મુકી દીધો છે. 

શું છે ફાલુન ગોંગ

1992માં આ સમુદાયમાં માનનારા લોકોની શરૂઆત થઈ હતી. હકીકતે તે એક પ્રકારની મેડિટેશન પ્રેક્ટિસ છે જે ચીનના જ જૂના કલ્ચર qigong  પર આધારીત છે. તેમાં સીધા બેસીને ખાસ રીતે શ્વાસ લેવામાં આવે છે તથા તેનાથી શરીર અને મનની બીમારીઓ દૂર કરવાનો દાવો કરવામાં આવે છે. આધ્યાત્મિક ગુરૂ લી હોગંજીએ તેની શરૂઆત કરી હતી. 

ચીનમાં લોકપ્રિય

પેરિસમાં રહેલી ચીનની એમ્બસીએ ફ્રાન્સમાં વસતા ચીનીઓ તે શીખી શકે તે માટે આ પદ્ધતિમાં માનતા લોકોને આમંત્રણ આપ્યું હતું. ખુદ ચીનની સરકારે પણ મેડિટેશનની આ પદ્ધતિથી સરકારના હેલ્થ પાછળ ખર્ચાતા અબજો રૂપિયા બચ્યા હોવાનું જાહેર કર્યું હતું. 

ચીનની શાંતિ માટે જોખમી કેમ બન્યા?

ચીનની સરકાર પાસે આનો કોઈ જ જવાબ નથી. સરકારે ફક્ત આ ધર્મ ચીન માટે ખતરારૂપ હોવાનો તર્ક આપ્યો છે. સરકારના મતે તે મેડિટેટર્સનું ખતરનાક જૂથ છે જે વિદેશી ધર્મોથી પ્રેરિત છે. સરકારી મીડિયાએ કરેલા દાવા પ્રમાણે આ સમુદાયના લોકો એકબીજાને અથવા પોતાની જાતને ટોર્ચર કરે છે અને તેમનામાં આત્મહત્યાનું પ્રમાણ વધારે છે. જો કે, સરકારી મીડિયા તેનું કોઈ પ્રમાણ નથી રજૂ કરી શકી અને ફોરેન એજન્સીઝને તેની તપાસ માટે આવવાની મંજૂરી પણ નથી અપાઈ. માનવાધિકાર માટે કામ કરતી સંસ્થા હ્યુમન રાઈટ્સ વોચે આ વાતોને બકવાસ ગણાવ્યો હતો. આ સમુદાયમાં માનનારાઓની વધતી સંખ્યાથી ચીનને જોખમ લાગ્યું હોવાની આશંકા છે. 

ટોર્ચરની શરૂઆત

આ કારણે ચીન સરકાર આ કોમ્યુનિટીના લોકોને પકડી-પકડીને લેબર કેમ્પ મોકલવા લાગી હતી. અનેક લોકોને પાગલખાનામાં ભરતી કરી દેવામાં આવ્યા હતા. ચીનમાં reform through labour એટલે કે લેબર કેમ્પમાં લોકોમાં બદલાવ લાવવાના ખાસ અભિયાનની શરૂઆત થઈ હતી. હકીકતે ત્યાં બદલાવના નામે હિંસા અને અત્યાચારની નવી શરૂઆત થઈ હતી. તેમાં લોકોને અનેક દિવસો સુધી ભૂખ્યા રાખવામાં આવતા, વીજળીના શોક આપવામાં આવતા, ખૂબ પાણી પીવડાવ્યા બાદ ટોઈલેટ વાપરવાની મંજૂરી ન અપાતી. 

દસ્તાવેજો પર સહી

આ રીતની હેરાનગતિથી તૂટી ચુકેલા લોકો પાસે 5 ડોક્યુમેન્ટ્સ સાઈન કરાવવામાં આવતા હતા. જેમાં મેડિટેશન પ્રેક્ટિસ બંધ કરવાથી લઈને સમુદાયના તમામ લોકો સાથે સંબંધ કાપવાનો પણ કરાર રહેતો. ત્યાર બાદ પણ ચીન સરકાર તેમના પર નજર રાખતી હતી. 

બેઈજિંગમાં શાંતિપૂર્ણ વિરોધ

આશરે 3 વર્ષ સુધી ચાલેલા આ પ્રકારના દમન બાદ ગોંગ સમુદાયે 25 એપ્રિલ, 1999ના રોજ બેઈજિંગના ઐતિહાસિક થિયાનમન ચોક ખાતે શાંત પ્રદર્શન યોજ્યું હતું જેમાં 10,000 લોકો એકઠા થયા હતા. ત્યાર બાદ સરકારી લોકો અને પોલીસે ત્યાં પહોંચીને તેમને ઉઠાવવાનું શરૂ કર્યું હતું અને ટિઆનજીન શહેરમાં લઈ જઈ ટોર્ચરિંગ બાદ તેમને છોડી દીધા હતા. 

આ માત્ર એક શરૂઆત હતી. તે રાતે ચીનના તત્કાલિન પ્રેસિડેન્ટ જિઆંગ જેમિને ગોંગ સમુદાયને ચીનની શાંતિ માટે જોખમી ઘોષિત કરી દીધો હતો અને તેમને કચડવા જરૂરી હોવાનું જાહેર કર્યું હતું. 

શરીરમાંથી અંગો કાઢી લેવાય છે

એક અહેવાલ પ્રમાણે ચીનમાં ગોંગ સમુદાયના લોકોના શરીરમાંથી કિડની, લિવર અને અન્ય અંગો કાઢીને તેનું બ્લેક માર્કેટમાં વેચાણ થઈ રહ્યું છે. ચીનમાં ઓર્ગન હાર્વેસ્ટિંગના ધંધામાં ગોંગ સમુદાયની સાથે ઉઈગર મુસ્લિમોના અંગ પણ કાઢી લેવામાં આવે છે. 

from Top Stories News - Gujarat Samachar : World's Leading Gujarati Newspaper https://ift.tt/3tdGHoN
via IFTTT