ચીની કંપનીઓ કમાણી માટે શહીદોની લાગણીને પણ નથી છોડતી, જોઈ લો આ તાજું ઉદાહરણ

- ગાલવાન અથડામણમાં માર્યા ગયેલા સૈનિકના અંતિમ શબ્દોને ટ્રેડમાર્ક કરાવવા હોડ

નવી દિલ્હી, તા. 17 માર્ચ, 2021, બુધવાર

ચીનના રાષ્ટ્રીય બૌદ્ધિક સંપત્તિ પ્રશાસન (NIPA)ના અહેવાલ પ્રમાણે 20મી ફેબ્રુઆરીથી અત્યાર સુધીમાં અનેક કંપનીઓએ 'ક્રિસ્ટલ ક્લિયર લવ' શબ્દનો ઉપયોગ કરવા માટે અરજી કરી છે. જો કે, ટ્રેડમાર્કની મંજૂરી માટે આવેલી આ તમામ અરજીઓને ફગાવી દેવામાં આવી છે અને NIPAએ આ કંપનીઓને ફટકાર લગાવી છે. 

હકીકતે ગાલવાન ખાતે ભારતીય સૈનિકો સાથેની અથડામણમાં જીવ ગુમાવનારા પીપલ્સ લિબરેશન આર્મી (PLA)ના એક સૈનિકે પોતાની ડાયરીમાં દેશભક્તિ સાથે જોડાયેલું એક વાક્ય લખ્યું હતું જે હવે ખૂબ વાયરલ થઈ રહ્યું છે. અનેક ચીની કંપનીઓ તે વાક્યને ટ્રેડમાર્ક કરાવવા રેસમાં ઉતરી છે. 

ચીનની કોમ્યુનિસ્ટ સરકારે ગત વર્ષે થયેલી અથડામણમાં પોતાના 5 સૈનિકો માર્યા ગયા હોવાની પૃષ્ટિ કરી હતી અને તમામ સૈનિકોની જાણકારી સાર્વજનિક કરી હતી. તેમાં Chen Xiangrongની અંગત ડાયરીમાં લખેલા શબ્દો વાયરલ થઈ રહ્યા છે. ચીની કંપનીઓને દેશભક્તિની તે અભિવ્યક્તિમાં ભારે મોટો નફો દેખાઈ રહ્યો છે પરંતુ સરકારે તેમના સપના પર પાણી રેડી દીધું છે. 

સૈનિકે પોતાની ડાયરીમાં દેશ પ્રત્યેનો પોતાનો પ્રેમ દર્શાવતા લખ્યું હતું કે, 'મારો પ્રેમ ક્રિસ્ટલ ક્લિયર છે અને તે ફક્ત ચીન માટે છે.'

NIPAના અહેવાલ પ્રમાણે 20 ફેબ્રુઆરીથી અત્યાર સુધીમાં અનેક કંપનીઓ અને વ્યક્તિઓએ 17 વસ્તુઓ પર ટ્રેડમાર્કની નોંધણી માટે 'ક્રિસ્ટલ ક્લિયર લવ'નો ઉપયોગ કરવા અરજી કરી છે જેમાં ખાણી-પીણીની વસ્તુઓનો પણ સમાવેશ થાય છે. જો કે, ચીન સરકારે કંપનીઓને સ્પષ્ટ શબ્દોમાં જણાવી દીધું છે કે, સૈનિકે દેશ પ્રત્યેના પોતાના પ્રેમ અને સન્માનને જે રીતે શબ્દોમાં વ્યક્ત કર્યું છે તેને નફો કમાવવાની દૃષ્ટિએ ન જોઈ શકાય. 

from Top Stories News - Gujarat Samachar : World's Leading Gujarati Newspaper https://ift.tt/3bYDHHr
via IFTTT