મહારાષ્ટ્ર : સરકારી હોસ્પિટલમાં આગ, 10 નવજાત બાળકો રાખ થઇ ગયાં

- મહારાષ્ટ્રના ભંડારા જિલ્લાની હૉસ્પિટલની હૃદયવિદારક ઘટના

- ન્યૂબોર્ન કેર યુનિટમાં 17 બાળકો હતાં

ભંડારા (મહારાષ્ટ્ર ) તા. 9 2021 શનિવાર

મહારાષ્ટ્રના ભંડારા  જિલ્લામાં આવેલી એક હૉસ્પિટલમાં આગ લાગતાં ન્યૂબોર્ન કેર યુનિટમાં રહેલાં સત્તરમાંથી દસ નવજાત બાળકો બળીને રાખ થઇ ગયાં હતાં.

ભંડારા જિલ્લા હૉસ્પિટલના સિવિલ સર્જ્યન ડૉક્ટર પ્રમોદ ખંડાતેએ કહ્યું હતું કે ન્યૂબોર્ન કેર યુનિટમાં સત્તર બાળકોને રાખવામાં આવ્યાં હતાં. શનિવારે મોડી રાત્રે એક વોર્ડમાંથી ધૂમાડા નીકળતાં દેખાયાં ત્યારે સ્ટાફ ન્યૂબોર્ન કેર યુનિટમાં દોડી ગયો હતો અને બાળકોને બચાવવાના પ્રયાસો કર્યા હતા. એ દરમિયાન દસ બાળકોનાં શરીર બળીને કોલસા જેવાં કાળાં થઇ ચૂક્યાં હતાં.

17માંથી ફક્ત સાત બાળકો બચી ગયાં હતાં. બાકીનાં બધાં બળીને રાખ થઇ ગયાં હતાં. શોર્ટ સર્કિટના કારણે આગ લાગી હોવાનું મનાતું હતું. દરમિયાન, હૉસ્પિટલની બહાર ભીડ જામી ગઇ હતી. લોકો હૉસ્પિટલની કહેવાતી બેદરકારીની ચર્ચા કરી રહ્યા હતા. જે બાળકો બળી ગયાં એમનાં કુટુંબીજનો કલ્પાંત કરી રહ્યા હતા. લોકોએ તપાસની માગણી કરી હતી. 

પોલીસે તપાસ શરૂ કરી હતી. આ લખાતું હતું ત્યાં સુધી કોઇની ધરપકડ થઇ નહોતી. મહારાષ્ટ્રના મુખ્ય પ્રધાન ઉદ્ધવ ઠાકરેએ આ ઘટનાની તપાસ કરવાનો આદેશ આપ્યો હતો. વિપક્ષો આ ઘટનાને નિમિત્ત બનાવીને રાજ્ય સરકારને ભીડાવવાના પ્રયાસો કરશે. 

from Top Stories News - Gujarat Samachar : World's Leading Gujarati Newspaper https://ift.tt/3hX5UPV
via IFTTT