બાઇડેનની નીતિથી ભારત-અમેરિકા વ્યાપાર વધી શકે છે, લાંબે ગાળે બંને દેશો વચ્ચે આર્થિક વ્યવહાર પણ સ્થપાઇ શકે

- સમગ્ર વિશ્વના વ્યાપારને બાઇડેનનાં પગલાંથી લાભ થશે

વૉશિંગ્ટન/ નવી દિલ્હી તા.21 જાન્યુઆરી 2021 ગુરૂવાર

અમેરિકાના નવા પ્રમુખ બનેલા જો બાઇડનના આગમથી અમેરિકી અર્થતંત્રમાં નવો પ્રાણ પૂરાય અને લાંબે ગાળે ભારત સાથેના અમેરિકી વેપાર વ્યવહારમાં પણ વૃદ્ધિ થાય એવું અર્થનિષ્ણાતો માની રહ્યા હતા. 

અત્યારે પરિસ્થિતિ એવી છે કે ભારત અને અમેરિકા વચ્ચે સરપ્લસ ટ્રેડ છે. ભારત અમેરિકામાં નિકાસ વધુ કરે છે. બાઇડેનના આવવાથી બંને દેશો વચ્ચેના વ્યાપારને પ્રોત્સાહન મળશે એમ મનાય છે. જો કે રાતોરાત કોઇ મોટો ફેરફાર નહીં થાય કારણ કે હાલ અમેરિકાની આર્થિક સ્થિતિ સારી નથી અને ત્યાં બેકારી પણ વધુ છે. પરંતુ અર્થનિષ્ણાતો માને છે કે બાઇડેન અમેરિકા માટે એવી સ્થાયી અને અનૂકૂળ અર્થનીતિ ઘડશે જે લાંબે ગાળે માત્ર ભારતને જ નહીં, સમગ્ર વિશ્વને લાભકારક નીવડશે. 

આગલા પ્રમુખ ડોનાલ્ડ ટ્રમ્પે વેપાર ધંધા બાબત કેટલીક કામચલાઉ ડીલ કરી હતી. હાર્લે ડેવિડસન પર ઇમ્પોર્ટ ડ્યૂટી જેવા કેટલાક સોદા બાબતમાં અડિયલ વર્તન રાખતા હતા. એજ રીતે ટ્રમ્પે અમેરિકા ફર્સ્ટની પોતાની સંકુચિત અને સંરક્ષણવાદી નીતિ દ્વારા એચ-1 વીઝાની નીતિમાં પણ સતત કપાત મૂકી હતી. એને કારણે સૌથી વધુ નુકસાન ભારતીય પ્રોફેશનલ્સને થયું હતું. 

નવા પ્રમુખ રાતોરાત આ બધાં પગલાંમાં ધરમૂળથી ફેરફાર કરશે એવું માનવાને કારણ નથી. પરંતુ તેમના વક્તવ્ય અને તેમના નીતિ વિષયક વિચારો પરથી એમ કહી શકાય કે એ લાંબા ગાળાના લાભનો વિચાર પહેલાં કરશે. તેમની સમક્ષ હાલ સંખ્યાબંધ પડકારો છે જેનો સામનો તેમણે કરવાનો છે. કોરોના પર કાબુ મેળવ્યા બાદ બાઇડેન પહેલાં અમેરિકી અર્થતંત્રને બળકટ બનાવવા પર ધ્યાન કેન્દ્રીત કરશે એમ મનાય છે. એનો લાભ આખી દુનિયાના દેશોને થશે. બાઇડેન વીઝા નીતિમાં હળવાશ લાવશે અને વ્યાપાર નીતિમાં પણ કેટલીક રાહતો જાહેર કરશે. 

જો કે આ કાર્ય ધારીએ એટલું સહેલું નથી  કારણ કે સેનેટમાં ડેમોક્રેટિક પક્ષ પાસે બહુ મામૂલી બહુમત છે. અમેરિકામાં વધી રહેલી બેકારી જોતાં વીઝા મામલે હાલ કોઇ રાહત ન આપવી એવા મુદ્દે બાઇડેન પર દબાણ વધી શકે છે.

from Top Stories News - Gujarat Samachar : World's Leading Gujarati Newspaper https://ift.tt/35Zrdf4
via IFTTT