ભારતીય લશ્કર ખરીદશે હાઇ પર્ફોર્મન્સ બોટ, લદ્દાખમાં પેંગોંગ સરોવરમાં પેટ્રોલિંગ કરશે

- ચીનની અડીબાજી સામે અગમચેતીનું પગલું 

નવી દિલ્હી તા.2 જાન્યઆરી 2021 શનિવાર

ભારતીય લશ્કર ટૂંક સમયમાં એક ડઝન હાઇ પર્ફોર્મન્સ બોટ ખરીદશે. લદ્દાખ સરહદે પેંગોંગ સરોવર વિસ્તારમાં પેટ્રોલિંગ માટે આવી બોટની જરૂર  હતી.

ગયા વર્ષના એપ્રિલથી ચીન સરહદી વિસ્તારમાં સતત અટકચાળા કરી રહ્યું હતું. ભારતીય સરહદમાં ઘુસણખોરી કરવા તેમજ કેટલાક ભારતીય પ્રદેશને પોતાના ગણાવવા ચીને પોતાના લશ્કરને લદ્દાખ સરહદે પેંગોંગ સરોવર નજીક તહેનાત કર્યું હતું. જો કે ભારતીય લશ્કરના જવાંમર્દ જવાનોએ બહાદૂરીથી ચીની લશ્કરને હંફાવીને પીછેહટ કરાવી હતી. આમ છતાં ચીની લશ્કરના જવાનો વારંવાર ભારતીય સરહદમાં ઘુસી આવતા હતા. બેચાર વખત ભારત અને ચીનના લશ્કરના જવાનો બાથંબાથી પર આવી ગયા હતા. 

દરમિયાન, શિયાળાની અસર શરૂ થતાં ચીની સૈનિકોને ઠંડી ભારે પડી હતી અને ચીની સૈનિકોને સારવાર માટે હૉસ્પિટલમાં લઇ જવા પડ્યા હતા. એક બાજુ વાટાઘાટનું નાટક કરીને બીજી બાજુ ચીન સતત લશ્કરી કુમક વધારી રહ્યું હતું. હવે પેંગોંગ સરોવર વિસ્તારમાં પેટ્રોલિંગ માટે ભારતીય લશ્કરે 12 હાઇ પર્ફોર્મન્સ બોટ ખરીદવાનો નિર્ણય કર્યો હતો. સંરક્ષણ મંત્ર્યાલયે આ ખરીદીને બહાલી આપી હતી.

ભારતીય લશ્કરે પોતાની જરૂરિયાત જણાવીને ગોવા શીપયાર્ડને આવી બોટ બનાવવાની વરદી આપી હતી. ગોવા શીપયાર્ડે ગુરૂવારે આ વરદીની વાતને સમર્થન આપ્યું હતું.

અત્યારે પૂર્વ લદ્દાખમાં ભારતીય લશ્કરના 50 હજાર જવાનો ફરજ બજાવી રહ્યા છે. અત્યારે તાપમાન માઇનસ 20 ડિગ્રી જેટલું થઇ ગયું હતું. આવી પરિસ્થિતિમાં પણ ભારતીય જવાનો ચીનની સાથે લડી લેવા તૈયાર હતા એમ લશ્કરી પ્રવક્તાએ કહ્યું હતું. ચીન સાથે મંત્રણાના આઠ તબક્કા પૂરા થયા પરંતુ હજુ ચીને પોતાનું લશ્કર પાછું ખેંચ્યું નથી એટલે ભારતીય લશ્કરે સાવધ રહેવું પડે છે.

હવે પેંગોંગ સરોવર વિસ્તારમાં સતત પેટ્રોલિંગ કરવા માટે હાઇ પર્ફોર્મન્સ બોટની જરૂર જણાતાં ભારતીય લશ્કરે આવી બાર બોટ ખરીદવાનો નિર્ણય કર્યો હતો. ચીની હિલચાલ પર સતત નજર રાખવાની ભારતીય લશ્કરને ફરજ પડી રહી હતી.

from Top Stories News - Gujarat Samachar : World's Leading Gujarati Newspaper https://ift.tt/3rKhPVS
via IFTTT