ખેડૂતો આજે કૃષિ કાયદાની નકલો બાળશે, સુપ્રીમ કોર્ટની કમિટિ સમક્ષ હાજર ન પણ થાય

- આંદોલન 50 દિવસનું થવા આવ્યું

નવી દિલ્હી તા.13 જાન્યુઆરી 2021 બુધવાર

છેલ્લા લગભગ પચાસ દિવસથી પાટનગર નવી દિલ્હીમાં આંદોલન કરી રહેલા ખેડૂતો આજે કેન્દ્ર સરકારે ઘડેલા નવા કૃષિ કાયદાની નકલો બાળશે એવી જાહેરાત કરવામાં આવી હતી.

સોમવારે સુપ્રીમ કોર્ટે કેન્દ્ર સરકારની ઝાટકણી કાઢ્યા બાદ એવી જાહેરાત કરી હતી કે અમે બીજો આદેશ ન આપીએ ત્યાં સુધી આ કાયદાનો અમલ અટકાવવો. બીજી બાજુ ખેડૂતોની વાત સાંભળવા માટે સુપ્રીમ કોર્ટે ચાર સભ્યોની એક સમિતિ બનાવી હતી જેમાં એક સભ્ય ખેડૂત નેતા છે અને બીજા ત્રણ કૃષિ નિષ્ણાત છે. જો કે એવી વાતો વહેતી થઇ હતી કે સમિતિના ચારેચાર સભ્યો નવા કૃષિ કાયદાની તરફેણ કરે છે એટલે ખેડૂતોએ આ સમિતિની ગંભીર નોંધ લીધી નહીં એવી છાપ પડી હતી. 

ખેડૂતોએ મંગળવારે એવી જાહેરાત કરી હતી કે અમે જરૂર પડ્યે હોળી સુધી આ આંદોલન લંબાવવા તૈયાર છીએ. અમારી માત્ર એક માગણી એ છે કે નવા કૃષિ કાયદા રદ કરવા. પરંતુ હવે આ પ્રશ્ન કેન્દ્ર માટે વટનો બની ગયો હોય એવું લાગે છે. કેન્દ્ર સરકારને એવું લાગતું હોઇ શકે કે એક જૂથના દબાણથી એક કાયદો રદ કરીએ તો આવતી કાલે બીજું જૂથ બીજો કાયદો રદ કરવા દબાણ કરશે. એટલે કેન્દ્ર સરકારે સ્પષ્ટ શબ્દોમાં કહી દીધું હતું કે કાયદા કોઇ હિસાબે રદ નહીં થાય.  જો કે અમુક સંજોગોમાં સુપ્રીમ કોર્ટ કાયદા રદ કરી શકે ખરી. પરંતુ આમ થવાથી કેન્દ્ર સરકાર અને સુપ્રીમ કોર્ટ વચ્ચે ગંભીર અથડામણ થવાની શક્યતા રહે છે.

એક જૂથ એમ માને છે કે સુપ્રીમ કોર્ટે રચેલી સમિતિની વાત ખેડૂતોએ સાંભલવી જોઇએ. સુપ્રીમ કોર્ટની અવગણના કરીને ખેડૂતો પોતાનાજ પગ પર કુહાડી મારવા જેવું કરશે. અત્યારે તો ખેડૂતોમાં પણ મતભેદ હોવાની છાપ પડતી હતી. એક અભિપ્રાય એવો છે કે દિલ્હીના સીમાડે રોજ હજારો ખેડૂતો બે સમય જમે છે, સવાર સાંજ ચાપાણી પીએ છે, મોબાઇલ ફોન ચાર્જિંગની વ્યવસ્થા થઇ છે, ઠંડી સામે રક્ષણ આપે એવા ફાઇબરના તંબુની વ્યવસ્થા થઇ છે એટલે આ આંદોલન ખરેખર તો સગવડિયું છે અને ખુદ ખેડૂતેા પણ આ વાત સમજે છે. અત્યારે તો મોદી સરકારને સુપ્રીમ કોર્ટના આદેશથી એક પ્રકારની રાહત મળી હતી એવું ખેડૂતોનું એક જૂથ માની રહ્યું હતું. ખેડૂતોને સુપ્રીમ કોર્ટની સમિતિ પર પણ પૂરો વિશ્વાસ હોય એવું જણાતું નહોતું. 

from Top Stories News - Gujarat Samachar : World's Leading Gujarati Newspaper https://ift.tt/3suDnX4
via IFTTT