હવે રેલવે સ્ટેશનો પર વાઈ-ફાઈની સુવિધા માટે હળવું કરવું પડશે ખિસ્સું, જાણો ભાવ

- એક મહિનાના 60 જીબી ડેટા પેક માટે 70 રૂપિયા ચુકવવા પડશે

નવી દિલ્હી, તા. 5 માર્ચ, 2021, શુક્રવાર

રેલટેલએ ફ્રી વાઈ-ફાઈની સુવિધા આપવાની સાથે જ કમાણીનું માધ્યમ પણ શોધી લીધું છે. રેલવે સ્ટેશનો પર હાઈસ્પીડ વાઈ-ફાઈની સુવિધા મેળવવા માટે ખિસ્સું હળવું કરવું પડશે. આ સુવિધાનો ઉપયોગ કરવા માટે ઓછામાં ઓછો 10 રૂપિયા ચાર્જ વસૂલવામાં આવશે. રેલવેએ 4,000 કરતા વધારે સ્ટેશનો માટે પેઈડ વાઈ-ફાઈ પ્લાન લોન્ચ કર્યો છે. જો કે, મુસાફરોને પહેલેથી ચાલતા અડધો કલાક ફ્રી વાઈ-ફાઈ પ્લાનનો લાભ મળતો રહેશે. અડધા કલાક બાદ જો તમે 5 જીબી ડેટાનો ઉપયોગ કરશો તો તે માટે 10 રૂપિયા ચુકવવા પડશે. 

સ્ટેશનો પર અડધા કલાક માટે 1 એમબીપીએસ સ્પીડ સુધી ફ્રી વાઈ-ફાઈની સુવિધા મળતી રહેશે પરંતુ અડધા કલાક બાદ પણ મુસાફરો ઈન્ટરનેટની સુવિધા વાપરવા ઈચ્છે તો તે માટે શુલ્ક ચુકવવો પડશે. આ માટે ઈન્ટરનેટની સુવિધા આપતી રેલટેલ એ પેઈડ પ્લાન લોન્ચ કર્યો છે. 

રેલટેલના સીએમડીના કહેવા પ્રમાણે મુસાફરોને 1 એમબીપીએસ સ્પીડ પર ફ્રી વાઈ-ફાઈની સુવિધા આપવામાં આવે છે જ્યારે પેઈડ વાઈ-ફાઈની સુવિધા 34 એમબીપીએસ સ્પીડની રહેશે. પોસ્ટ પેઈડ પ્લાન અંતર્ગત 5 જીબી ડેટા પેક માટે 10 રૂપિયા શુલ્ક લેવામાં આવશે અને 10 જીબી ડેટાનો ઉપયોગ કરવા પ્રતિદિન 15 રૂપિયા આપવા પડશે. 

આ જ રીતે 10 જીબી ડેટા 5 દિવસમાં વાપરવા 20 રૂપિયા, 20 જીબી ડેટા 5 દિવસમાં વાપરવા 30 રૂપિયા અને 10 દિવસમાં વાપરવા 40 રૂપિયા શુલ્ક આપવો પડશે. પોસ્ટ પેઈડ પ્લાનમાં મુસાફરો એક મહિનાનો પ્લાન પણ લઈ શકશે. આ પ્લાન અંતર્ગત 60 જીબી ડેટા પેક માટે 70 રૂપિયા ચુકવવા પડશે. 

અડધો કલાક વાઈ-ફાઈ વાપર્યા બાદ મોબાઈલ પર એક મેસેજ આવશે. બાદમાં ગેટ-વેના માધ્યમથી શુલ્ક ચુકવવાની સુવિધા મળશે. ઉલ્લેખનીય છે કે, રેલવે 7,950 કરતા પણ વધારે સ્ટેશનો પર અડધા કલાક માટે ફ્રી વાઈ-ફાઈની સુવિધા આપે છે. કોવિડ-19 પહેલા 2.9 કરોડ લોકો આ સુવિધાનો લાભ ઉઠાવી ચુક્યા છે. 

from Top Stories News - Gujarat Samachar : World's Leading Gujarati Newspaper https://ift.tt/3sPrhXD
via IFTTT