ઈટાલી-ફ્રાંસ ફરી શરૂ કરશે એસ્ટ્રાજેનેકા વેક્સિનનો પ્રયોગ, પોલિટિકલ બેન હોવાનું સ્વીકાર્યું

- યુરોપીય દેશોએ બ્રેક્ઝિટના કારણે વેક્સિન પર પ્રતિબંધ મુક્યો હતો 

નવી દિલ્હી, તા. 17 માર્ચ, 2021, બુધવાર

વિશ્વના અનેક દેશો દ્વારા એસ્ટ્રાજેનેકા વેક્સિન પર કામચલાઉ પ્રતિબંધ મુકવામાં આવતા દરેકની ચિંતા વધી ગઈ હતી. પરંતુ ઈટાલી અને ફ્રાંસે હવે આ પ્રતિબંધ હટાવી લેવાનો નિર્ણય લીધો છે અને ટૂંક સમયમાં જ બંને દેશો પોતાના ત્યાં ફરીથી વેક્સિનેશન શરૂ કરાવી દેશે. 

ઈટાલીના વડાપ્રધાન મારિયો દ્રાઘીએ ફ્રાંસના રાષ્ટ્રપતિ ઈમૈનુઅલ મેક્રોન સાથે આ અંગે ચર્ચા કરી હતી અને એસ્ટ્રાજેનેકાનો ઉપયોગ ફરી શરૂ કરવાની વાત કરી હતી. બંને દેશોના કહેવા પ્રમાણે તેઓ ફક્ત યુરોપિયન મેડિસિન એજન્સીના નિવેદનની રાહ જોઈ રહ્યા હતા જે હજુ સુધી હકારાત્મક જ રહ્યું છે.

એસ્ટ્રાજેનેકા પર લગાવવામાં આવેલો પ્રતિબંધ ફક્ત એક રાજકીય નિર્ણય હોવાનો દાવો કરવામાં આવ્યો છે કારણ કે, એસ્ટ્રાજેનેકા વેક્સિન ઓક્સફોર્ડ સાથે મળીને બનાવવામાં આવી છે. આ સંજોગોમાં યુરોપીય દેશોએ બ્રેક્ઝિટના કારણે વેક્સિન પર પ્રતિબંધ મુક્યો હતો જે એક રાજકીય પગલું હતું. 

ઉલ્લેખનીય છે કે, આશરે બે ડઝન જેટલા યુરોપીય દેશોએ છેલ્લા કેટલાક દિવસમાં એસ્ટ્રાજેનેકા વેક્સિન પર કામચલાઉ પ્રતિબંધ મુક્યો હતો. આ વેક્સિન લીધા બાદ કેટલાક લોકોના શરીરમાં લોહીના ગઠ્ઠા જામી ગયા હતા જેની ખૂબ ખરાબ અસર પડી હતી તેવો દાવો કરવામાં આવ્યો હતો. 

વેક્સિનેશન રોકાયા બાદ યુરોપીય દેશોમાં અનેક પ્રકારના જૂથ બની ગયા હતા જે આ પ્રતિબંધનો વિરોધ કરતા હતા. ઈટાલીના મેડિસિન રેગ્યુલેટરના કહેવા પ્રમાણે તેમણે ફક્ત એટલા માટે એસ્ટ્રાજેનેકા પર પ્રતિબંધ મુક્યો હતો કે, જર્મની અને ફ્રાંસ દ્વારા પ્રતિબંધ મુકાયા બાદ તેમના પર દબાણ આવ્યું હતું. 

ઉલ્લેખનીય છે કે, યુરોપીય દેશો અને બ્રિટન વચ્ચે લાંબા સમયથી બ્રેક્ઝિટ વિવાદ ચાલી રહ્યો છે અને ગત વર્ષે જ બ્રેક્ઝિટને મંજૂરી મળી હતી. જો એસ્ટ્રાજેનેકા વેક્સિનની વાત કરીએ તો વિશ્વ સ્વાસ્થ્ય સંગઠને આ વેક્સિનને સંપૂર્ણપણે સુરક્ષિત ગણાવી છે. આ વેક્સિનને WHOના વેક્સ મિશન અંતર્ગત વિશ્વના અનેક દેશોમાં મોકલવામાં આવી રહી છે. 

from Top Stories News - Gujarat Samachar : World's Leading Gujarati Newspaper https://ift.tt/3bSmDTa
via IFTTT