પાકિસ્તાનમાં વડા પ્રધાન મોદીનાં પોસ્ટર લાગ્યાં, અલગ સિંધુદેશ માટે મોટી રેલી નીકળી

- ઇમરાન ખાનનું ટેન્શન વધ્યું

ઇસ્લામાબાદ તા.18 જાન્યુઆરી 2021 સોમવાર

પાકિસ્તાનમાં રવિવારે અલગ સિંધુદેશ માટે મોટી રેલી નીકળી હતી અને આ રેલીમાં ભારતના વડા પ્રધાન નરેન્દ્ર મોદીનાં સંખ્યાબંધ પોસ્ટર અને બેનર્સ લાગ્યાં હતાં.

સિંઘના સન્ન શહેરમાં આ રેલી યોજાઇ હતી. દિવસે દિવસે વડા પ્રધાન ઇમરાન ખાન સામે લોકોનો રોષ વધતો જતો હોય એવા અણસાર જોવા મળ્યા હતા. 

અત્યાર અગાઉ પીઓકે, બાલ્ટિસ્તાન, ગીલગીટ વગેરે વિસ્તારોએ પણ અલગ થવાની માગણી સાથે દેખાવો અને સભારેલીઓ યોજ્યા હતા. હવે સિંધના સન્ન શહેરમાં અલગ સિંધુદેશની માગણી સાથે આવી રેલી રવિવારે 17 જાન્યુઆરીએ યોજાઇ હતી. રેલીમાં જોડાનારા લોકો સતત ભારતના વડા પ્રધાન નરેન્દ્ર મોદીના સમર્થનમાં સૂત્રો પોકારી રહ્યા હતા. જો કે મોદી ઉપરાંત દુનિયાના બીજા દેશોના નેતાઓનાં પોસ્ટર પણ જોવા મળ્યાં હતાં.

આ વિશે માહિતી આપનારા સૂત્રે કહ્યું કે રાષ્ટ્રીય નેતા જી એમ સૈયદના જન્મદિનને સિંધના લોકો રાષ્ટ્રીય દિવસ તરીકે ઊજવે છે. અમે ભારતના વડા પ્રધાન નરેન્દ્ર મોદી, ઇઝરાયેલના વડા પ્રધાન અને અમેરિકાના નવા વરાયેલા પ્રમુખ જો બાઇડનને પણ અપીલ કરી હતી કે અમને સિંઘની આઝાદી મેળવવામાં મદદ કરો. ઇમરાન ખાનની સરકારે અમને પરેશાન કરી નાખ્યા હતા. પાકિસ્તાને પ્રતિબંધ લાદ્યો હોવા છતાં અમે મોદી પર બહુ મોટી આશા રાખીને બેઠાં છીએ.

છેલ્લા થોડા મહિનાથી પાકિસ્તાનમાં જીવન જરૂરી ચીજોના ભાવ આસમાને ગયા હતા અને લોકો ત્રાહિમામ પોકારી ગયા હતા. હવે વિવિધ વિરોધ પક્ષો સંગઠિત થયા હતા અને સતત દર રવિવારે ઇમરાન ખાન વિરોધી સભારેલીઓ યોજી રહ્યા હતા. આ લોકો કહે છે કે ઇમરાન ખાનની સરકાર જવી જોઇએ અને પાકિસ્તાનમાં નવેસર સંસદીય ચૂંટણી થવી જોઇએ. દેશના વહીવટમાં ઇમરાન ખાન સદંતર નિષ્ફળ ગયા હતા એવો આક્ષેપ પણ વિરોધ પક્ષો સતત કરી રહ્યા હતા. ઇમરાન સામે વિવિધ પક્ષો પરસ્પરના મતભેદો ભૂલીને એક થઇ રહ્યા હોય એવું લાગતું હતુ.

from Top Stories News - Gujarat Samachar : World's Leading Gujarati Newspaper https://ift.tt/3nX3qm2
via IFTTT