‘ખેડૂત આંદોલનની જેમ અમારી પણ નોંધ લ્યો’, ઓમર અબ્દુલ્લાએ સુપ્રીમ કોર્ટને અપીલ કરી

- 370મી કલમ ગેરકાયદે હટાવવામાં આવી છે

શ્રીનગર / નવી દિલ્હી તા.16 જાન્યુઆરી 2021 શનિવાર

જમ્મુ કશ્મીરના ભૂતપૂર્વ મુખ્ય પ્રધાન નેશનલ કોન્ફરન્સના નેતા ઓમર અબ્દુલ્લાએ કહ્યું હતું કે સુપ્રીમ કોર્ટે ખેડૂત આંદોલનની નોંધ જાતે લીધી એ રીતે જમ્મુ કશ્મીરની પણ નોંધ લેવી જોઇએ.

તેમણે એવો આક્ષેપ કર્યો હતો કે કેન્દ્ર સરકારે ગેરકાયદેસર રીતે જમ્મુ કશ્મીરને ખાસ દરજ્જો આપતી 370મી કલમ રદ કરી હતી. સુપ્રીમ કોર્ટે એની નોંધ લઇને જમ્મુ કશ્મીરની પ્રજાને ન્યાય આપવો જોઇએ. ઓમરે કહ્યું કે પોતાની રોજિંદી કામગીરી વચ્ચે ય સુપ્રીમ કોર્ટ ખેડૂત આંદોલનની નોંધ લઇ શકે તો જમ્મુ કશ્મીરની 370મી કલમને લગતા કેસની પણ સ્વયં નોંધ લઇ શકે.

ઓમરે કહ્યું કે નવા કૃષિ કાયદા અંગે સુપ્રીમ કોર્ટે કહ્યું કે કેન્દ્ર સરકારે એકપક્ષી રીતે અને કોઇની સલાહ લીધા વિના આ કાયદા ઘડ્યા હતા. એ જ રીતે 2019ના ઑગષ્ટની પાંચમીએ જમ્મુ કશ્મીરનો ખાસ દરજ્જો નાબૂ કરતો નિર્ણય લીધો એમાં કોઇની સલાહ લીધી નહોતી. એટલે સુપ્રીમ કોર્ટે આ મામલે પણ તત્કાળ સુનાવણી હાથ ધરવી જોઇએ. જમ્મુ કશ્મીરની પ્રજાની લાગણીની વાત છે.

શ્રી રંજન ગોગોઇ ચીફ જસ્ટિસ હતા ત્યારે આ મુદ્દે 2019ના ઑગષ્ટની 29મીએ સુપ્રીમ કોર્ટે કેન્દ્રને નોટિસ આપી હતી. આ કેસ જસ્ટિસ એન વી રમણની કોર્ટને સોંપવામાં આવ્યો હતો. 2019ના ઓક્ટોબરની પહેલીએ પાંચ જજોની બનેલી બેન્ચે આ કેસની સુનાવણી પણ શરૂ કરી હતી. ત્યારબાદ એવો નિર્ણય લેવાયો હતો કે સાત જજોની બેંચ આ કેસને હાથ ધરશે. એવું કંઇ બને એ પહેલાં કોરોના અને લૉકડાઉન આવી પડતાં જમ્મુ કશ્મીરનો કેસ અટકી પડ્યો હતો.

ઓમર અબ્દુલ્લાએ કહ્યું કે અમને સુપ્રીમ કોર્ટ પર ભરોસો છે. સુપ્રીમ કોર્ટે કહ્યું હતું કે જરૂર પડ્યે કોઇ કાયદા સામે સ્ટે ઓર્ડર આપી શકાય છે અને જરૂર પડ્યે કાયદા રદ પણ કરી શકાય છે. જો કે અમુક સમયગાળા પછી વધુ ફેરફાર શક્ય ન બને. જેમ જેમ સમય વીતતો ચાલશે તેમ તેમ દેશના તમામ લોકોને જમ્મુ કશ્મીરમાં વસવાટની સગવડ મળી જશે. સરકારી હોદ્દાઓ પર પોતાના માણસોને ગોઠવી દેવામાં આવશે. પછી કહેવામાં આવશે કે હવે તો જેલમમાં ઘણાં નીર વહી ગયાં એટલે હવે કંઇ થઇ શકે નહીં. માટે સુપ્રીમ કોર્ટે તત્કાળ આ કેસની સુનાવણી હાથ ધરવી જોઇએ એમ ઓમરે કહ્યું હતું.

from Top Stories News - Gujarat Samachar : World's Leading Gujarati Newspaper https://ift.tt/3nPvebS
via IFTTT