અમેરિકી સંસદ ભવનમાં ટ્રમ્પ સમર્થકોની ધાંધલ, સેનેટ કબજે કરવાના પ્રયાસ કર્યા

- પોલીસ ગોળીબારમાં એક મહિલાનું મોત

વૉશિંગ્ટન ડીસી તા.7 જાન્યુઆરી 2021 ગુરૂવાર

વિદાય લઇ રહેલા અમેરિકી પ્રમુખ ડોનાલ્ડ ટ્રમ્પના સમર્થક મનાતા એક ટોળાએ કેપિટલ હિલમાં ધસી જઇને સેનેટ કબજે કરવાના પ્રયાસ કર્યા હતા. હિંસક ટોળાને વિખેરવા પોલીસે કરેલા ગોળીબારમાં એક મહિલાનું મોત નીપજ્યું હતું. પોલીસ અને સિક્યોરિટી દળોએ તોફાનીઓને બહાર કાઢ્યા હતા.

વાસ્તવમાં કેપિટલ હિલમાં ઇલેક્ટોરલ કૉલેજની પ્રક્રિયા ચાલુ હતી અને ગમે તે ઘડીએ જો બાઇડનને નવા પ્રમુખ જાહેર કરવાની ગણતરી ગણાતી હતી ત્યારે ટ્રમ્પ સમર્થકોએ હજારોની સંખ્યામાં એક માર્ચ યોજી હતી અને કેપિટલ હિલ તરફ ધસી ગયા હતા. આમ તો સિક્યોરિટીએ આ ટોળાને ખાળવા પૂરતી વ્યવસ્થા કરી હતી પરંતુ ધાંધલ ધમાલ અટકી નહીં અને લોકો કેપિટલ હિલમાં ઘુસી ગયા હતા. તેમને રોકવા પોલીસે લાઠીચાર્જ ટીઅર ગેસ વગેરે સાધનો અજમાવ્યાં હતાં પરંતુ કશી કારી ફાવી નહોતી. આખરે પોલીસે ગોળીબાર કરવો પડ્યો હતો જેમાં એક મહિલા મરણ પામી હતી. આખો વિસ્તાર ખાલી કરાયો ત્યારે જોવા મળ્યું હતું કે ટ્રમ્પના સમર્થકો પાસે ગન ઉફરાંત બીજાં ખતરનાક શસ્ત્રો પણ હતાં.

પરિસ્થિતિ વણસતી જોઇને ટ્રમ્પ અને જો બાઇડન બંનેએ શાંતિ અને વ્યવસ્થા જાળવવાની જાહેર અપીલ કરી હતી. અત્યાર અગાઉ પણ ટ્રમ્પના સમર્થકોએ અવારનવાર હિંસક દેખાવો કર્યા હતા.પરંતુ કેપિટલ હિલમાં ઘુસવાનો આ પહેલો પ્રયાસ હતો. વાતાવરણ વધુ તંગ બનતાં વૉશિંગ્ડટન ડીસીમાં કર્ફ્યૂ લાદવામાં આવ્યો હતો.

જો બાઇડને જાહેરમાં એવી અપીલ કરી હતી કે ડોનાલ્ડ ટ્રમ્પે દેશની માફી માગવી જોઇએ અને પોતાના તોફાની સમર્થકોને રોકવા જોઇએ. ત્યાર બાદ ટ્રમ્પે ટ્વીટર પર પોતાના સમર્થકોને શાંતિથી વિખેરાઇ જઇને ઘર ભેગા થવાની અપીલ કરી હતી. જો કે આ અપીલમાં પણ એમણે ચૂંટણીમાં ગોલમાલ થયાનું પોતાનું જૂનું ગાણું ફરી એકવાર ગાયું હતું.

ઉપપ્રમુખ માઇક પેંસે હિંસાની ટીકા કરી હતી અને કહ્યું હતું કે હિંસાથી કદી કોઇ સમસ્યાનું નિરાકરણ થતું નથી.

from Top Stories News - Gujarat Samachar : World's Leading Gujarati Newspaper https://ift.tt/2XhL0S9
via IFTTT