ગૂગલનો મુકાબલો કરવા માટે ISROએ MapmyIndia સાથે મિલાવ્યા હાથ

- ઉપગ્રહ દ્વારા મળતી માહિતી સામાન્ય લોકો સુધી પહોંચાડવાનો ઉદ્દેશ્ય

બેંગલુરૂ, તા. 13 ફેબ્રુઆરી, 2021, શનિવાર

ઈસરોએ મેપમાયઈન્ડિયા સાથે મળીને દેશના પ્રથમ સંપૂર્ણપણે ઘરેલુ મેપિંગ પોર્ટલ અને ભૂ-સ્થાનિક સેવાઓ શરૂ કરવાની પહેલ કરી છે. તેના દ્વારા મેપમાયઈન્ડિયાના ડિજિટલ નકશાઓ અને ટેક્નોલોજીને ઈસરોના ઉપગ્રહ વડે તૈયાર કરવામાં આવેલી તસવીરો, પૃથ્વીના અધ્યયન અને ડેટા સાથે જોડવામાં આવશે. 

સામાન્ય લોકો સુધી માહિતી પહોંચાડવાનો ઉદ્દેશ્ય 

મેપમાયઈન્ડિયા એક ભારતીય કંપની છે જે ડિજિટલ નકશાઓનો ડેટા બનાવે છે. તેના CEO અને ED રોહન વર્માએ આ ભાગીદારીને આત્મનિર્ભર ભારત તરફનું એક પગલું ગણાવ્યું હતું જેનાથી ભારતીય વપરાશકર્તાઓની ગૂગલ મેપ અને અર્થ પરની નિર્ભરતા ખતમ થઈ શકે. 

અંતરિક્ષ વિભાગના અહેવાલ પ્રમાણે તેમણે ગુરૂવારે મેપમાયઈન્ડિયાની માલિકીની કંપની સીઈ ઈન્ફો સિસ્ટમ્સ પ્રાઈવેટ લિમિટેડ સાથે સમજૂતી કરી હતી. તે અંતર્ગત ભૂ-સ્થાનિક સેવાઓ ઉપલબ્ધ કરાવવા માટે ઈસરો દ્વારા પૃથ્વીનું સમસ્ત અધ્યયન કરવામાં આવ્યું છે તે, ભારતીય નેવિગેશન સિસ્ટમ 'નાવિક', હવામાન અને મહાસાગર સાથે જોડાયેલી સેવાઓ, કંપનીની વેબ સેવાઓ, પોર્ટલ વગેરેના સંયુક્ત ઉપયોગની સંભાવનાઓ શોધવામાં આવશે. 

નકશાઓને વિવાદિત ઠેરવતી વિદેશી કંપનીઓની મુક્તિ

આ ભાગીદારીના કારણે ભારતના નકશાઓને સરકાર દ્વારા નિર્ધારિત કરવામાં આવેલી સરહદ અંતર્ગત જ પ્રસ્તુત કરવામાં આવશે. ઉલ્લેખનીય છે કે, ઘણી વખત વિદેશી કંપનીઓ આપણા દેશના નકશાઓને ખોટી રીતે દર્શાવીને વિવાદ સર્જતી હોય છે. આ ભાગીદારીના કારણે ક્ષેત્રીય જાણકારીઓ અને માહિતીઓને પણ વધુ નક્કર રીતે મેળવી શકાશે. 

વિદેશી કંપનીઓને આપણા દ્વારા થતી કમાણી બંધ થશે

મેપની સુવિધા આપતી ગૂગલ સહિતની મોટા ભાગની કંપનીઓ ઘણી વખત યુઝર્સનો ડેટા તેમને કહ્યા વગર જ એકત્રિત કરે છે અને બાદમાં વિજ્ઞાપનો માટે વેચી દે છે. ઈસરો અને કરારમાં સામેલ કંપની આ મોડલ પર કામ નહીં કરે. આ સંજોગોમાં વિદેશી કંપનીઓને આપણા દ્વારા જે કમાણી થઈ રહી છે તે પણ અટકશે. 

from Top Stories News - Gujarat Samachar : World's Leading Gujarati Newspaper https://ift.tt/3jIyUfp
via IFTTT