ટોસિલિઝુમેબના નામે સ્ટીરોઈડના ઇન્જેક્શન વેચવાના કૌભાંડમાં ભાજપ સાથે સંકળાયેલા બોડી બિલ્ડરની ધરપકડ

સ્ટીરોઈડસના ઈન્જેક્શનને કોરોનાના દર્દીને અપાતા ટોસિલિઝુમેબમાં ખપાવીને વેચવાના સુરતમાંથી પકડાયેલા કૌભાંડનો રેલો અમદાવાદ સુધી પહોંચ્યો છે. સાલ હોસ્પિટલમાં દાખલ મહિલા દર્દીની દીકરીને આ નકલી ઈન્જેક્શન પધરાવવામાં આવ્યા હતા. જો કે ડોક્ટરને શંકા જતા તેમણે દર્દીને આ ઈન્જેક્શન આપ્યું ન હતું.

અમદાવાદમાંથી પકડાયેલા આ કૌભાંડમાં પોલીસે ભાજપ સાથે સંકળાયેલા મનાતા કાર્યકર તેમજ બોડી બિલ્ડિંગમાં મિસ્ટર અમદાવાદ રહેલા હર્ષ ઠાકોર તેમજ 2 મેડિકલ સ્ટોરના માલિક અને સુરતના કૌભાંડી સોહેલ સહિત 5 સામે ગુનો નોંધી હર્ષ અને નિલેશની ધરપકડ કરી છે. હર્ષ ઠાકોરના ભાજપના ટોચના નેતાઓ સાથેના ફોટોગ્રાફ વાઈરલ થતાં વિવાદ થયો છે. 2 થી 4 હજાર રૂપિયામાં વેચાતા સ્ટીરોઈડસના આ ઈન્જેક્શન રૂ.1.35 લાખમાં વેચવામાં આવ્યા હોવાનું પોલીસ તપાસમાં બહાર આવ્યું છે.

સાલ હોસ્ટિપલમાં કોરોનાની સારવાર લઇ રહેલા લતાબહેન બલદુઆને ડો.દેવાંગ શાહે ટોસિલિઝુમેબનું પ્રિસ્કિપ્શન લખી આપ્યું હતું. જેથી તેમની દીકરી પ્રિયંકાબહેન આ ઈન્જેક્શન માટે તપાસ કરી રહ્યાં હતાં. ત્યારે તેમને જાણવા મળ્યું હતું કે આ ઈન્જેક્શન બજારમાં સરળતાથી મળતું નથી. જેથી તેમણે સંબંધી જૈનિલ શાહ અને મિત્ર રુષભ શાહ મારફતે તપાસ કરાવી હતી. જેમાં સાલ હોસ્ટિપલના મેસ નર્સ(કેર ટેકર) દીપકભાઇએ સુભાષબ્રિજ કલેક્ટર કચેરી પાસે આવેલા મા ફાર્મસીની માલિક આશિષભાઇ શાહનો નંબર આપ્યો હતો. આશિષભાઇ સાથે વાત કરવામાં આવતાં તેમણે તેમના ભાઇ અક્ષય સાથે વાત કરાવીને રૂ.1.35 લાખમાં ટોસિલિઝુમેબ ઈન્ફેક્શનનાં 3 બોક્સ આપવાની વાત કરી હતી. જેથી ડો.દેવાંગ શાહને શંકા જતાં તેમણે ઈન્જેક્શન મૂકી રાખ્યા હતા અને આ અંગે ફૂડ એન્ડ ડ્રગ ડિપાર્ટમેન્ટે જાણ કરી હતી. જેના આધારે ત્યાંની ટીમ આવી હતી અને આ કૌભાંડની તપાસ શરૂ કરી હતી. આ કૌભાંડનો પર્દાફાશ થયો હતો.

પાંચ સામે ફરિયાદ, બેની ધરપકડ

• હર્ષ ભરતભાઇ ઠાકોર, (સુપથ બંગલોઝ, ચાંદખેડા)
• આશિષ દિનેશભાઇ શાહ, (ઘનશ્યામનગર, સુભાષબ્રિજ)
• અક્ષય દિનેશભાઇ શાહ, (ઘનશ્યામનગર, સુભાષબ્રિજ)
• નિલેશ ચંદ્રકાંત લાલિવાલા, (પ્રભાકુંજ સોસાયટી,પાલડી)
• સોહેલ ઈસ્માઈલ તાઈ, (સન સિટી, રાંદેર, સુરત)

સાલના કેર ટેકરની સંડોવણી
હોસ્પિટલના કેર ટેકર દીપકભાઇ પાસે અક્ષય અને આશિષના નામ, નંબર, સરનામું કેવી રીતે આવ્યાં તે દિશામાં પોલીસે તપાસ શરૂ કરી છે. આ કૌભાંડમાં દીપકભાઇના પણ સંડોવણી હોવાનું પોલીસનું કહેવું છે. હાલમાં દીપકભાઇના ધરપકડ કરાઈ નથી.

હર્ષ 2થી 3 હજારમાં ઈન્જેક્શન લાવતો
હર્ષ ઠાકોર એથ્લેટ હોવાથી તે નિલેશ પાસેથી 2થી 3 હજારમાં સ્ટીરોઈડના ઈન્જેક્શન ખરીદતો હતો. પરંતુ નિલેશે હર્ષને ક્યારેય ટોસિલિઝુમેબના ઈન્જેક્શન વેચ્યા નહીં હોવાનું તેણે પોલીસને જણાવ્યું હતું. વધુમાં નિલેશે પોલીસને જણાવ્યું કે તેણે સ્ટીરોઈડના ઈન્જેક્શનનું નામ કે લેબલ બદલીને ક્યારેય હર્ષને વેચ્યા નથી.

હર્ષ ઠાકોર ભાજપનો કોઈ સક્રિય કાર્યકર્તા નથી
અમદાવાદ શહેર ભાજપ પ્રમુખ જગદીશ પંચાલે જણાવ્યું હતું કે, આ વ્યક્તિનો મને કોઇ પરિચય નથી તેથી એટલું કહી શકું કે તે શહેર ભાજપનો કોઇ સક્રિય કાર્યકર્તા નથી. તેનું ભાજપ સાથે કોઇ જોડાણ છે કે નહીં તે પણ મારે ચકાસણી કરીને જ કહી શકાય. બાકી અમારા નેતાઓ લોકપ્રિય હોવાથી તેમની સાથે અસંખ્ય લોકોએ ફોટો પડાવ્યા હોય તેથી તેમનો સંબંધ પ્રસ્થાપિત થતો નથી.

Download Dainik Bhaskar App to read Latest Hindi News Today

નકલી ઇન્જેક્શન વેચવાના કૌભાંડમાં ઝડપાયેલ આરોપીઓ.

from Divya Bhaskar https://ift.tt/2CsdQbX
via IFTTT