પેટ્રોલ-ડીઝલ બાદ ડુંગળીની કિંમતોએ રોવડાવ્યા, જાણો ક્યારે ઘટી શકે છે ભાવ

- મહારાષ્ટ્ર અને મધ્ય પ્રદેશમાં કમોસમી વરસાદથી ડુંગળીના પાકને નુકસાન

નવી દિલ્હી, તા. 22 ફેબ્રુઆરી, 2021, સોમવાર

પેટ્રોલ-ડીઝલ અને રાંધણ ગેસની વધી રહેલી કિંમતો વચ્ચે ડુંગળીના ભાવોમાં વધારાના કારણે ઘરેલું બજેટ ખોરવાયું છે. આ સાથે જ છૂટક માર્કેટમાં ડુંગળીની કિંમત 50 રૂપિયા પ્રતિ કિલો સુધી પહોંચી ગઈ છે. જો કે, સરકારને આશા છે કે માર્ચ મહિનામાં ડુંગળીની આવક વધશે એટલે ભાવ ઘટી જશે. આ સાથે જ કેન્દ્ર સરકાર બફર સ્ટોક દ્વારા રાજ્યોને ડુંગળી પહોંચાડી શકે છે. 

મહારાષ્ટ્ર અને મધ્ય પ્રદેશમાં કમોસમી વરસાદ એ ડુંગળીની કિંમતોમાં અચાનક આવેલા વધારા પાછળનું મુખ્ય કારણ છે. આ બંને પ્રદેશોમાં વરસાદ અને કરા વરસવાના કારણે ડુંગળીનો પાક ખરાબ થઈ ગયો છે. આ કારણે એશિયાની સૌથી મોટી મંડી લાસલગાંવમાં ડુંગળીની કિંમત 4,200 રૂપિયા પ્રતિ ક્વિન્ટલ સુધી પહોંચી ગઈ છે. 

ગ્રાહક મંત્રાલયના અહેવાલ પ્રમાણે રાજધાની દિલ્હીમાં ડુંગળીની કિંમતોમાં 20 દિવસમાં 10થી 15 રૂપિયાનો વધારો થયો છે. માર્ચ મહિનામાં ડુંગળીની આવક વધવા સાથે કિંમતો ઘટશે તેવી આશા છે પરંતુ કેટલાક નિષ્ણાંતો ડુંગળીની કિંમતોમાં હજુ પણ વધારો થશે તેવું માની રહ્યા છે.

from Top Stories News - Gujarat Samachar : World's Leading Gujarati Newspaper https://ift.tt/3pCtALX
via IFTTT