ગોંડામાં અપહ્યત બાળકને છોડાવાયો, 4 કરોડની ખંડણી માંગનારી મહિલાની પણ ધરપકડ

લખનૌ, તા. 25 જુલાઈ 2020, શનિવાર

ઉત્તર પ્રદેશના ગોંડા ખાતેથી અપહરણ કરવામાં આવેલા એક વેપારીના પૌત્રને પોલીસે સકુશળ પાછો મેળવ્યો છે. અપહરણની આ ઘટનામાં 4 કરોડ રૂપિયાની ખંડણી માંગનારી એક યુવતીને પણ પોલીસે ઝડપી લીધી છે.

આ સાથે જ આ સમગ્ર ઘટનાક્રમમાં 4 લોકોની ધરપકડ કરવામાં આવી છે. અપહરણની ઘટના સામે આવ્યાના ગણતરીના કલાકોમાં જ યુપી પોલીસે આ સમગ્ર કેસ ઉકેલી નાખ્યો હતો અને ધરપકડ પહેલા પોલીસની બદમાશો સાથે અથડામણ થઈ હોવાના પણ સમાચાર છે. 

અપહ્યત બાળકને હેમખેમ પાછો મેળવનારી એસટીએફની ટીમને સરકારે બે લાખ રૂપિયાનું ઈનામ આપ્યું છે. આ અથડામણમાં બે બદમાશોના પગે ગોળી વાગ્યાના પણ સમાચાર છે. યુપીના એડીજી (કાયદો-વ્યવસ્થા) પ્રશાંત કુમારે પોલીસ કાર્યવાહીમાં બે ગુનેગાર ઉમેશ યાદવ અને દીપુ કશ્યપ ઘાયલ હોવાની માહિતી આપી હતી. તે સિવાય સૂરજ પાંડે, છવિ પાંડે અને તેના ભાઈની ધરપકડ કરવામાં આવી છે. 

આ કેસમાં પોલીસે એક અલ્ટો ગાડી જપ્ત કરી છે અને તે સિવાય ગુનેગારો પાસેથી પિસ્તોલ અને બે તમંચા પણ મળી આવ્યા છે. હાલ ઘાયલ થયેલા અપહરણકારોની સારવાર ચાલી રહી છે. પોલીસ બદમાશોને મેડિકલ સેવા પૂરી પાડ્યા બાદ આગળની કાર્યવાહી કરશે. તે સિવાય આ કેસમાં સામેલ અન્ય લોકો વિરૂદ્ધ પણ કાર્યવાહી થશે.

શાસન તરફથી સ્થાનિક પોલીસ અને એસટીએફને 1-1 લાખ રૂપિયાનું ઈનામ આપવાની જાહેરાત કરવામાં આવી છે. પોલીસ હાલ સમગ્ર વિસ્તારમાં કોમ્બિંગ ઓપરેશન ચલાવી રહી છે અને આ કેસમાં સામેલ તમામ અપરાધીઓની ધરપકડ કરાઈ છે. આ કેસના મુખ્ય અપહરણકર્તા અને એક મહિલા બંને હાલ પોલીસના કબજામાં છે. 

કેસની વિગતો પ્રમાણે ગોંડા ખાતે એક વેપારીના દીકરાનું અપહરણ કરવામાં આવ્યું હતું. માસ્ક વહેંચવા આવવાના બહાને ગુનેગારોએ વેપારીના દીકરાનું અપહરણ કરી લીધું હતું અને ખંડણી માંગી હતી. અપહરણની ઘટના સામે આવ્યા બાદ પોલીસ પ્રશાસન અને એસટીએફની ટીમ તપાસમાં લાગી હતી. 

from Top Stories News - Gujarat Samachar : World's Leading Gujarati Newspaper https://ift.tt/2WTltit
via IFTTT