વંદન છે લદ્દાખના આ ગામની ધરાને, વર્ષોથી દરેક ઘરમાંથી નીકળે છે સૈનિકો

લદ્દાખ, તા. 2 જુલાઈ 2020, ગુરૂવાર

લદ્દાખમાં માત્ર 63 ઘરો ધરાવતું એક નાનું એવું ગામ આવેલું છે જેના મોટા ભાગના લોકો ભારતીય સેના સાથે સંકળાયેલા છે. આ ગામના દરેક ઘરમાંથી નાની ઉંમરની તમામ વ્યક્તિ ભારતીય સેનાની સદસ્ય છે અને તેમની પોસ્ટિંગ લાઈન ઓફ એક્ચ્યુઅલ કંટ્રોલના નિકટવર્તી ક્ષેત્રોમાં થઈ છે. અનેક પેઢીથી ચુશોત ગામના લોકો સેનામાં સેવા આપતા આવ્યા છે. આ ગામના લોકો લદ્દાખ સ્કાઉટ, ઈન્ફ્રેંટ્રી રેજિમેન્ટનો હિસ્સો પણ છે. અહીંના કોમળ, વિનમ્ર પરંતુ ખતરનાક યોદ્ધા યુવાનોએ જૂની પરંપરા જાળવી રાખી છે. 

ચુશોત ગામના મોટા ભાગના લોકો આર્મીમાં પોતાની સેવા આપતા આવ્યા છે. આ ગામમાં મહિલાઓ ખૂબ જોવા મળે છે અને કેટલાક નાના બાળકો પણ નજરે ચડે છે. સેનામાં સામેલ થયેલા લોકો આ ગામમાં રહે છે. જારા બાનો નામની એક 34 વર્ષીય મહિલાના પતિ ફરજ દરમિયાન શહીદ થયા હતા અને તેમના ત્રણેય ભાઈઓ પણ સેનામાં છે. જારા બાનોએ જણાવ્યું કે, 'મારે બે દીકરા છે જે કદાચ ભારતીય સેનામાં સામેલ થશે. છોકરાઓ માટે અહીં આ નિયમ જેવું છે.'

જો કે જારા બાનો પોતાની બંને દીકરીઓના ભવિષ્ય અંગે સ્પષ્ટતાથી નથી વિચારી શકતા. જારા બાનોએ પોતાની વેદના વર્ણવતા કહ્યું કે, 'મારી બંને દીકરીઓને પણ યોગ્ય શિક્ષણની જરૂર છે. અહીં અમારા પાસે સારી શાળાની વ્યવસ્થા નથી. હું તેમના ભવિષ્ય અંગે નિશ્ચિંત નથી.'

યોગ્ય શાળાઓનો અભાવ

ગામના અન્ય લોકો પણ આ જ ચિંતાનો સામનો કરી રહ્યા છે. શિક્ષણનો અભાવ અહીંના લોકોને પાછા પાડી રહ્યો છે. અહીં મહિલાઓ અને પુરૂષો શિક્ષણને લઈ એક સરખા ચિંતિત છે. હજિરા બાનોના ત્રણેય ભાઈ લદ્દાખ સ્કાઉટનો હિસ્સો છે અને તેઓ ત્રણેય એલએસી પાસે પૂર્વીય લદ્દાખમાં તૈનાત છે. હજિરા બાનોએ પોતાના ભાઈઓ અંગે ચિંતા વ્યક્ત કરતા કહ્યું હતું કે, 'અમને ખબર નથી કે તેઓ કેમ છે. અહીં ફોન નેટવર્ક ડાઉન છે અને વર્તમાન સ્થિતિ જોતા ભાઈઓને ફોન વાપરવાની મંજૂરી નથી.'

રૂકૈયા બાનો નામની 27 વર્ષીય યુવતી ગ્રેજ્યુએશન કરવા ગઈ હતી પરંતુ તેમણે વચ્ચેથી જ પોતાનો અભ્યાસ છોડી દેવો પડ્યો હતો. હાલ તેઓ નેશનલ રૂરલ લાઈવલીહુડ મિશનમાં કામ કરે છે. આ સરકારી મિશન દ્વારા મહિલા સશક્તિકરણને પ્રોત્સાહન આપવામાં આવી રહ્યું છે. 

છોકરીઓ માટે હાઈ સ્કુલથી આગળનો અભ્યાસ અઘરો

આ ગામની મોટા ભાગની છોકરીઓ હાઈ સ્કુલથી આગળ નથી ભણી શકતી. અહીંના છોકરાઓ 121મા ધોરણ સુધી અભ્યાસ કરે છે જેથી તેઓ ભારતીય સેનામાં સામેલ થઈ શકે. અહીંની વૃદ્ધ મહિલાઓ પોતાના બાળકો અંગે વાત કરતા અચકાય છે પરંતુ યુવાન મહિલાઓ આગળ વધીને વાત કરી લે છે. સેનામાં સામેલ થતા અહીંના બહાદુર છોકરાઓને જો યોગ્ય શિક્ષણ મળે તો તેઓ સૈન્ય અધિકારી તરીકે પણ ઉભરી શકે છે. 

યોગ્ય શિક્ષણના અભાવ સામે ઝઝુમતા લોકો

1971માં ભારત અને પાકિસ્તાન વચ્ચે જે યુદ્ધ થયેલું તેના હીરો ગુલામ મોહમ્મદને બે દીકરા છે. તેઓ ઈચ્છે છે કે જો ગામમાં યોગ્ય શિક્ષણ મળી રહે તો તેમના દીકરાઓ પણ સૈન્ય અધિકારી બની શકે. રિટાયર્ડ હવાલદાર ગુલામ મોહમ્મદે જણાવ્યું કે, 'અહીં અમારા પાસે સારા શિક્ષણનો અભાવ છે. હું ઈચ્છું છું કે અમારી આગળની પેઢી સેનામાં અધિકારી બને.'

from Top Stories News - Gujarat Samachar : World's Leading Gujarati Newspaper https://ift.tt/2Bl5imD
via IFTTT