2021ના જાન્યુઆરી સુધીમાં કોંગ્રેસને નવા અધ્યક્ષ મળશે, કોંગ્રેસ કારોબારી સમિતિની ચૂંટણી પણ યોજાશે

-હાલ પક્ષમાં એ માટે મનોમંથન થઇ રહ્યું હોવાનો દાવો

નવી દિલ્હી તા.16 ઓક્ટોબર 2020 શુક્રવાર

2021ના જાન્યુઆરીમાં કોંગ્રેસ પક્ષને નવા અધ્યક્ષ મળી જશે એવું કોંગ્રેસના વિશ્વાસપાત્ર સૂત્રે જણાવ્યું હતું. આ સૂત્રે એવો દાવો પણ કર્યો હતો કે પક્ષની કારોબારી સમિતિની ચૂટણી પણ કરવામાં આવશે જેથી કોઇને આ બાબતમાં ફરિયાદ ન રહે. 

અત્યારે જે રીતે તૈયારી ચાલી રહી હતી એ કાર્યક્રમ મુજબ બધું આગળ વધશે તો કારોબારી સમિતિની ચૂંટણી પણ એક મહિનામાં કરી લેવામાં આવશે. કોંગ્રેસ પક્ષમાં છેલ્લે 1997માં કારોબારી સમિતિની ચૂંટણી થઇ હતી જ્યારે સીતારામ કેસરી પક્ષ પ્રમુખ હતા. પક્ષના 1200 સભ્યો કારોબારી સમિતિના સભ્યોની ચૂંટણી કરશે.

થોડા સમય પહેલાં શશી થરુર, કપિલ સિબલ, ગુલામ નબી આઝાદ વગેરે 23 નેતાઓએ સોનિયા ગાંધીને પત્ર લખીને જે ફરિયાદો કરી હતી તેમાં પક્ષને કાયમી પ્રમુખ અને ચૂંટાયેલી કારોબારી સમિતિ આપવાની માગણીનો પણ સમાવેશ થયો હતો. આ પત્રમાં એવો પણ ઉલ્લેખ હતો કે 2014 પછી પક્ષ કોઇ મોટી ચૂંટણીમાં વિજેતા થયો નથી. ઊલટું પક્ષ દિવસે દિવસે શાખ ગુમાવી રહ્યો હતો. પક્ષને કાયમી પ્રમખની તાતી જરૂર હતી.  પત્ર લેખકોમાં પાંચ ભૂતપૂર્વ મુખ્ય પ્રધાન, કોંગ્રેસ કારોબારીના કેટલાક સભ્યો, કેટલાક વર્તમાન સાંસદો અને ભૂતપૂર્વ કેન્દ્રીય પ્રધાનોનો સમાવેશ થયો હતો. 

આ સૂત્રે જણાવ્યા મુજબ નવેંબરના અંત સુધીમાં ચૂંટણીના કાર્યક્રમની વિગત જાહેર કરી દેવામાં આવશે. 

from Top Stories News - Gujarat Samachar : World's Leading Gujarati Newspaper https://ift.tt/3lOxcsA
via IFTTT