370મી કલમના મુદ્દે ફારુખ અબ્દુલ્લા લડાયક મૂડમાં, આજે તેમના ઘરે વિભાજનવાદી નેતાઓની બેઠક મળશે

- ફારુખે ચીનની મદદથી ખાસ દરજ્જો મેળવવાની જાહેરાત કરી હતી

શ્રીનગર તા.15 ઓક્ટોબર 2020 ગુરૂવાર

જમ્મુ કશ્મીરના ભૂતપૂર્વ મુખ્ય પ્રધાન અને ભૂતપૂર્વ કેન્દ્રીય પ્રધાન ડૉક્ટર ફારુખ અબ્દુલ્લાના ઘરે આજે જમ્મુ કશ્મીરના વિભાજનવાદી નેતાઓની એક બેઠક મળવાની છે જેમાં જમ્મુ કશ્મીરને ફરી ખાસ દરજ્જો અપાવવા માટે લડત ચલાવવાના મુદ્દે ચર્ચા વિચારણા થશે.

હાલની કેન્દ્ર સરકારે 2019ના ઑગષ્ટની પાંચમીએ જમ્મુ કશ્મીરને ખાસ દરજ્જો આપતી બંધારણની 370મી કલમ રદ કરીને તમામ કશ્મીરી પોલિટિશ્યનોની ધરપકડ કરી હતી. હવે ફારુખે બે દિવસ પહેલાં એવી ઘોષણા કરી હતી કે અમે ચીનની મદદથી જમ્મુ કશ્મીરને ફરી ખાસ દરજ્જો અપાવીશું. ફારુખે પોતાના જેવા સમાન વિચારો ધરાવતા કશ્મીરી નેતાઓની એક બેઠક આજે ગુરૂવાર 15મી ઓક્ટોબરે પેાતાને ઘેર બોલાવી હતી. આ બેઠકમાં પીડીપીના મહેબૂબા મુફ્તી પણ હાજર રહેવાનાં છે. 2019ના ઑગષ્ટની ચોથીએ ગુપકાર ડેક્લેરેશન નામે એક જાહેર નિવેદન તમામ કશ્મીરી નેતાઓએ બહાર પાડ્યું હતું જેમાં 370 મી કલમ રદ કરવાના પ્રખર વિરોધનો મુદ્દો મુખ્ય હતો.

હવે 14 મહિના પછી આ ગુપકાર જૂથની  બેઠક આજે ફારુખના ઘરે યોજાવાની છે. સુપ્રીમ કોર્ટમાં ભૂતપૂર્વ મુખ્ય પ્રધાન મહેબૂબા મુફ્તીની ધરપકડની અરજીની સુનાવણી નીકળે એ પહેલાં મંગળવારે 13 ઓક્ટોબરે તેમને નજરકેદમાંથી મુક્ત કરાયાં હતાં. એ પછી તરત નેશનલ કોન્ફરન્સના નેતા અને ભૂતપૂર્વ મુખ્ય પ્રધાન ઉમર અબ્દુલ્લા મહેબૂબાને મળ્યા હતા. ત્યારબાદ આ બંને વચ્ચે ગુફ્તેગુ થઇ હતી. હવે આજની બેઠકમાં નેશનલ કોન્ફરન્સ, પીડીપી, કોંગ્રેસ, સજ્જાદ લોનનો પીપલ્સ કોન્ફરન્સ, પીડીએફ, માર્કસવાદી પક્ષ અને બીજા વિભાજનવાદી જૂથો જોડાવાની શક્યતા હતી. જો કે શાહ ફૈઝલ જોડાશે કે કેમ એ નક્કી નહોતું કારણ કે ફૈઝલ અગાઉ જ સક્રિય રાજકારણ છોડવાની જાહેરાત કરી ચૂક્યા હતા. માત્ર ભાજપ અને ભૂતપૂર્વ પ્રધાન અલ્તાફ બુખારી આવી બેઠકની વિરુદ્ધ હતા. બાકી બધા કશ્મીરી નેતાઓ આ બેઠકમાં હાજરી આપે એવી શક્યતા હતા. 

જોવાનું એ હતું કે નજરકેદમાંથી મુક્ત થયા બાદ મહેબૂબા મુફ્તીએ કરેલા ભડકામણા નિવેદન પછી સ્થાનિક વહીવટી તંત્ર આ બેઠકની પરવાનગી આપે છે કે કેમ. આ બેઠક આજે બપોરે ચાર વાગ્યે શરૂ થવાની છે. એ ક્યારે પૂરી થશે એની જાહેરાત કરવામાં આવી નથી. જો કે આજની બેઠક દ્વારા એ સ્પષ્ટ થશે કે જમ્મુ કશ્મીરનું રાજકારણ કઇ દિશામાં વળાંક લઇ રહ્યું છે.

from Top Stories News - Gujarat Samachar : World's Leading Gujarati Newspaper https://ift.tt/3k2778P
via IFTTT