ટ્રમ્પ જનાધાર ગુમાવી રહ્યાના મળ્યા નિર્દેશો, 72 ટકા ભારતીયો અને સ્થાનિકો બાઇડેન સાથે

- પ્રમુખપદની ચૂંટણી રસાકસી ભરેલી બનશે

વૉશિંગ્ટન તા.15 ઓક્ટોબર 2020 ગુરૂવાર

આવતા મહિનાની ત્રીજી તારીખે (ત્રીજી નવેંબરે) અમેરિકી પ્રમુખપદની ચૂંટણી છે. આ ચૂંટણીમાં અમેરિકામાં દાયકાઓથી વસતા ભારતીય મૂળના અમેરિકી નાગરિકો બહુ મહત્ત્વનો ફાળો આપતા રહ્યા છે. આ વખતની ચૂંટણીમાં 72 ટકા ભારતીયો અને અમેરિકી નાગરિકોએ ટ્રમ્પને સાથ નહીં આપવાનો નિર્ણય કર્યો હોવાનું મનાતું હતું.

બુધવારે 14મી ઓક્ટોબરે થયેલા એક સર્વેક્ષણમાં એવું જાણવા મળ્યું હતું કે 72 ટકા જેટલા ભારતીયો અને અમેરિકીઓનો જનાધાર ટ્રમ્પ ગુમાવી રહ્યા હતા. જો કે એમાં ટ્રમ્પની પોતાની જવાબદારી ઘણી વધુ હતી. ભારતીય બૌદ્ધિકોને અન્યાય થાય એવાં પગલાં લેવાની જાહેરાત ટ્રમ્પ એક કરતાં વધુ વખત કરી ચૂક્યા હતા. લેટેસ્ટ સર્વે મુજબ કુલ રજિસ્ટર્ડ ભારતીય મતદારોમાં 72 ટકા મતદારો જો બાઇડેનને મત આપવાનું પસંદ કરી રહ્યા હતા. જો બાઇડેન ડેમોક્રેટિક પક્ષના ઉમેદવાર છે. માત્ર 22 ટકા ભારતીયો હાલના પ્રમુખ રિપબ્લિકન પક્ષના ડોનાલ્ડ ટ્રમ્પને ફરી ચૂંટવાના મતના હતા.

અત્યાર અગાઉ  મોટા ભાગના ભારતીયો રિપબ્લિકન પક્ષના ટેકેદાર હતા. પરંતુ આ વખતે તેમનો ઝુકાવ ડેમોક્રેટિક પક્ષના ઉમેદવાર તરફ હોવાનું આ સર્વેમાં જાણી શકાયું હતું. ત્રણ ટકા ભારતીયો એવા હતા જે કોઇ ત્રીજા પક્ષના ઉમેદવારને મત આપવાનું વિચારતા હતા જ્યારે અન્ય ત્રણ ટકા કોઇને મત આપવાના મૂડમાં નહોતા. આ સર્વેનાં પરિણામો જાહેર કરનાર સંસ્થાએ કહ્યું હતું કે કુલ મતદારોમાં ત્રણ ચતુર્થાંશ મતદારો ડેમોક્રેટિક પક્ષ પ્રત્યે પ્રતિબદ્ધ હતા એવું જાણી શકાયું હતું. આ રિપોર્ટમાં એવો દાવો કરાયો હતો કે મોટા ભાગના ભારતીયો ટ્રમ્પની વિદેશ નીતિના મુદ્દે ચિંતિત હતા. પોતાની વિદેશ નીતિ અંગે ટ્રમ્પ વારે વારે  જુદી જુદી વાતો કરતા હતા.

આ રિપોર્ટનો સાર એવો પણ હતો કે ઉપરાષ્ટ્ર પ્રમુખપદના ડેમોક્રેટિક પક્ષના ઉમેદવાર કમલા હેરિસે ભારત અમેરિકી સંબંધોને કેન્દ્રમાં રાખીને પોતાનો પ્રચાર કર્યો હતો. ડેમોક્રેટિક પક્ષને મત આપવાની પ્રેરણા કમલા હેરિસે ભારતીય મતદારોને આપી હતી એમ કહીએ તો ચાલે.

from Top Stories News - Gujarat Samachar : World's Leading Gujarati Newspaper https://ift.tt/33ZgvVd
via IFTTT