જવાનો માટે બુલેટપ્રૂફ વાહન નથી, PM મોદી માટે કરોડોનું વિમાન : રાહુલ ગાંધી

-રાહુલે એક વિડિયો ક્લીપ સોશ્યલ મિડિયા પર મૂકી

નવી દિલ્હી તા.10 ઓક્ટોબર 2020 શનિવાર

કોંગ્રેસના વરિષ્ઠ નેતા રાહુલ ગાંધીએ વડા પ્રધાન નરેન્દ્ર મોદી પર આકરો શાબ્દિક પ્રહાર કરતાં કહ્યું કે ભારતીય લશ્કરના જવાનો માટે બુલેટપ્રૂફ ટ્રક સુદ્ધાં નથી અને વડા પ્રધાન માટે 8,400 કરોડનું વિમાન ખરીદવામાં આવે છે. 

પોતાના વિધાનની સાર્થકતા પુરવાર કરતાં રાહુલે એક વિડિયો ક્લીપ સોશ્યલ મિડિયા પર મૂકી હતી જેમાં લશ્કરી ટ્રકમાં બેઠેલા બે જવાનો આપસમાં વાત કરી રહ્યા હતા કે આપણને નોન-બુલેટપ્રૂફ વાહનમાં મોકલીને આ લોકો આપણા જાન સાથે ખેલી રહ્યા છે... આ વિડિયો ક્લીપ સાથે રાહુલે લખ્યું હતું કે આપણા સીમાડા સાચવતા જવાનો માટે બુલેટપ્રૂફ ટ્રક સુદ્ધાં નથી અને વડા પ્રધાન માટે કરોડો રૂપિયાનું વિમાન ખરીદવામાં આવે છે. 

બે દિવસ પહેલાં પણ રાહુલે ટ્વીટ કરી હતી કે વડા પ્રધાન માટે 8,400 કરોડનું વિમાન આવ્યું. આટલી રકમ દ્વારા સરહદો સાચવતા જવાનો માટે કંઇક ખરીદી શકાયું હોત. સરહદો પર તનાવ સર્જાયેલો છે. વિમાનની રકમમાંથઈ ત્રીસ લાખ ગરમ વસ્ત્રો, 60 લાખ જેકેટ્સ, 67 લાખ જોડી બૂટ, 16,80,000 ઓક્સિજન સિલિન્ડર. વડા પ્રધાનને માત્ર પોતાની ઇમેજની ચિંતા છે, દેશના જવાનોની નહીં. 

શુક્રવારે રાહુલે એવી ટ્વીટ કરી હતી કે આપણા વડા પ્રધાન કશું જાણતા સમજતા નથી એવું નથઈ, સૌથી ભયજનક વાત એ છે કે એમને વાસ્તવિકતા સમજાવી શકે એવું કોઇ એમની આસપાસ નથી. એમની આસપાસ જે લોકો છે એમનામાં વડા પ્રધાનને મોઢામોઢ કહેવાની હિંમત નથી. રાહુલે ચીનનો પણ વારંવાર ઉલ્લેખ કર્યો હતો અને કહ્યું હતું કે ચીને આપણી કમજોરીનો લાભ ઊઠાવ્યો હતો. ચીનને ખ્યાલ આવી ગયો હતો કે મોદીએ દેશને કમજોર કરી નાખ્યો હતો.

from Top Stories News - Gujarat Samachar : World's Leading Gujarati Newspaper https://ift.tt/3iLlBZm
via IFTTT