રાફેલ વિમાનનો જોટો ચીન-પાકિસ્તાન પાસે નથી, જાણો... રાફેલ વિમાનોની વિશેષતા

- શા માટે રાફેલ અજેય વિમાન ગણાય છે

નવી દિલ્હી તા.10 સપ્ટેંબર 2020 ગુરૂવાર

ફ્રાન્સ પાસેથી ભારતે ખરીદેલાં રાફેલ વિમાન આજે ભારતીય હવાઇ દળમાં સહભાગી થવાના છે ત્યારે આ વિમાન શી રીતે અન્ય લડાયક વિમાનો કરતાં જુદાં પડે છે એ જાણવું રસપ્રદ થઇ પડશે. આ વિમાનનો જોટો પાકિસ્તાન કે ચીન પાસે નથી. નેપાળ તિબેટ જેવાં નાનકડાં દેશોને આ વિમાન પરવડે પણ નહીં. આ વિમાનની કઇ કઇ અને કેવી કેવી ખૂબી છે એનો સાર આ મુજબ છે.

આ વિમાનમાંથી છોડાતાં શસ્ત્રો-બોમ્બ 3,700 કિલોમીટર દૂર રહેલા શત્રુને ઊડાડી શકે છે,  આ વિમાન બે એંજિન ધરાવે છે એટલે એની ઉડ્ડયન ક્ષમતા વધી જાય છે, આ વિમાનમાં ત્રણ પ્રકારના મિસાઇલ્સ વાપરી શકાય છે- 1) આસમાનમાં રહીને જમીન પરથી હવામાં શત્રુને ઊડાવી દઇ શકાય એવાં સકાલ્પ મિસાઇલ, 2) આસમાનમાં રહીને આસમાનમાં રહેલા શત્રુને ઠાર કરતા મિટિયોર મિસાઇલ, અને હેમર મિસાઇલ. (હેમર એટલે ભારે વજનદાર  હથોડો).

આ વિમાનોની અન્ય ખૂબીઓ આ રહી. સ્ટાર્ટ થતાંની સાથે અત્યંત ઝડપથી આ વિમાન ખાસ્સી ઊંચાઇ ધારણ કરી લે છે. દર સેકંડે આ વિમાન 300 મીટર જેટલી ઊંચાઇ પકડી લે છે, એટલે કે ફક્ત એક મિનિટમાં રાફેલ 18 હજાર મીટર ઊંચે ઊડી શકે છે. આ વિમાન ઓમની રોલ લડાયક વિમાન છે. લદ્દાખ સરહદ માટે આ વિમાન એકદમ ફિટ છે. પહાડી વિસ્તારોમાં સાવ ઓછી જગ્યામાં આ વિમાન ઊતરી શકે છે. એજ રીતે  દરિયામાં તરતા લડાયક જહાજોમાં પણ રાફેલ ઊતરી શકે છે. એકવાર ઇંધણ લીધા પછી આ વિમાન દસ કલાક ઊડી શકે છે અને હવામાં રહીને ઇંધણ ભરી શકે છે. ફ્રાન્સથી ભારત આવતી વખતે એ જ રીતે આ વિમાનોએ આસમાનમાં ઈંધણ ભર્યું હતું. આ વિમાનની ગન એક મિનિટમાં 2500 ફાયર કરી શકે છે અને એમાં રહેલી રડાર સિસ્ટમ પોતાની આસપાસના 100 કિલોમીટરના ક્ષેત્રમાં રહેલા એક સાથે 40 ટાર્ગેટને ઓળખીને વાર કરી શકે છે. આ વિમાન એક સાથે 24 હજાર 500 કિલોમીટર જેટલો સામાન-ભાર ઊંચકીને પણ 60 કલાકથી વધુ સમય સુધી ઊડી શકે છે. આ વિમાનમાં જે મિસાઇલ્સ લગાડેલી છે એનો ઉપયોગ સિરિયા અને લીબિયા જેવાં સ્થળોમાં કરીને એની ચોક્સાઇ ચકાસી લેવામાં આવી હતી.

અત્યારે ભારતને આવાં પાંચ વિમાન મળ્યાં છે. કુલ 36 વિમાનનો સોદો 2016માં થયો હતો. અત્યારે આ વિમાન ભારતીય હવાઇ દળના અંબાલા મથકમાં છે જે પાકિસ્તાનની પંજાબ નજીકની સરહદ પર છે. પાકિસ્તાન કોઇ અટકચાળું કરે તો આ વિમાન દ્વારા એને જબ્બર થપ્પડ મારી શકાશે.

from Top Stories News - Gujarat Samachar : World's Leading Gujarati Newspaper https://ift.tt/3hkUyDn
via IFTTT